២ប្រទេសទៀត ប្រកាសមិនចូលរួមកិច្ចប្រជុំសន្តិភាពអ៊ុយក្រែន នៅ ស្វីស

ឥឡូវ មាន២ប្រទេសទៀតហើយ បានប្រកាសមិនចូលរួមកិច្ចប្រជុំសន្តិភាពអ៊ុយក្រែន ដែលនឹងធ្វើឡើងក្នុងប្រទេសស្វីស នៅថ្ងៃទី១៥-១៦ខែមិថុនា ខាងមុខ នោះគឺប្រទេសម៉ិកស៊ិក និងនីការ៉ាហ្គា។ នេះបើតាមការចុះផ្សាយរបស់​សារព័ត៌មាន Sputnik នៅថ្ងៃសុក្រទី៧ខែមិថុនា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ស្ថានទូតម៉ិកស៊ិក ប្រចាំនៅរុស្ស៊ី បានចេញសេចក្តីថ្លែងការណ៍ថា “ម៉ិកស៊ិក បានទទួលលិខិតអញ្ជើញឲ្យចូលរួមកិច្ចប្រជុំកំពូលស្តីពីសន្តិភាព នៃជម្លោះអ៊ុយក្រែននាសប្តាហ៍ក្រោយក្នុងប្រទេសស្វីស។ ម៉ិកស៊ិកនឹងមិនចូលរួមក្នុងព្រឹត្តិការណ៍នេះឡើយ។ ប្រទេសរបស់យើងតស៊ូមតិសន្តិភាព ដូច្នេះយើងរំពឹងថា ឆាប់ៗនេះ អាចនឹងមានការចរចាដែលពាក់ព័ន្ធនឹងភាគីទាំងសងខាងនៃជម្លោះ តែម្តង”។

ចំណែកប្រទេសនីការ៉ាហ្គា ឯណោះវិញ ក៏បដិសេធចូលរួមដែរ ថែមទាំងរិះគន់ជំនួបកំពូលនេះថា ជា “ឆាកល្ខោននយោបាយ” ទៀតផង។ ក្រសួងការបរទេសនីការ៉ាហ្គា ប្រកាសថា “នីការ៉ាហ្គា មិនដែលចូលរួម ហើយក៏នឹងមិនចូលរួមក្នុងឆាកល្ខោននយោបាយ ដែលគ្មានគោលដៅស្វែងរកផ្លូវទៅកាន់សន្តិភាពដែរ”។

ទោះបីជាយ៉ាងណាក៏ដោយ ជុំវិញកិច្ចប្រជុំនេះ ប្រធានាធិបតីអ៊ុយក្រែនលោក វ្ល៉ាឌីមៀរ ហ្សេលេនស្គី បានអះអាងកាលពីដើមខែថា មានប្រទេសនិងអង្គការអន្តរជាតិដល់ទៅជាង១០០ឯណោះ ដែលបង្ហាញចេតនាចង់ចូលរួមក្នុងកិច្ចខិតខំនាំមកសន្តិភាព ជូនទីក្រុងកៀវ។

សូមបញ្ជាក់ជាថ្មី ប្រទេសស្វីស នឹងយករមណីយដ្ឋាន Buergenstock នៅខាងក្រៅទីក្រុង Lucerne ធ្វើជាម្ចាស់ផ្ទះរៀបចំកិច្ចប្រជុំកំពូលនេះ ដែលនឹងមានការចូលរួមពីសំណាក់ប្រតិភូរាប់រយមកពីជុំវិញពិភពលោក។

ទោះបីជាយ៉ាងណាក៏ដោយ អ្វីដែលធ្វើឲ្យគេហួសចិត្តនោះគឺត្រង់ថា កិច្ចប្រជុំស្វែងរកសន្តិភាព បែរជាមានភាគីជម្លោះតែម្ខាងគឺអ៊ុយក្រែន ហើយគ្មានភាគីម្ខាងទៀត គឺ រុស្ស៊ី ទៅវិញ៕

អត្ថបទ៖ សុខ សុវណ្ណ

ចុចអាន៖ ថៃ នឹងចូលរួមកិច្ចប្រជុំសន្តិភាពអ៊ុយក្រែន នៅ ស្វីស