ព័ត៌មានអន្ដរជាតិ

កូរ៉េខាងត្បូង-អាមេរិក ប្រជុំគ្នាបន្ទាន់តាមទូរសព្ទ មុនជំនួបរវាងរុស្ស៊ី និងក្រុងព្យុងយ៉ាង

បានផុស

២ years មុន

នៅ

ថ្ងៃសុក្រ ១៤ មិថុនា ២០២៤

ដោយ

Chheang

កូរ៉េខាងត្បូង និងសហរដ្ឋអាមេរិក បានហៅទូរសព្ទបន្ទាន់មួយពិភាក្សាគ្នាអំពីរឿងពាក់ព័ន្ធនឹងដំណើរទស្សនកិច្ចរបស់លោក វ៉្លាឌឺមៀ ពូទីន មេដឹកនាំរុស្ស៊ី ទៅកាន់ក្រុងព្យុងយ៉ាង ប្រទេសកូរ៉េខាងជើង។ នេះបើយោងតាមការប្រកាសរបស់ក្រសួងការទេសកូរ៉េខាងត្បូង នៅថ្ងៃសុក្រទី១៤ ខែមិថុនា។

ជំនួបរវាងលោក គីម ជុងអ៊ុន និងលោក វ៉្លាឌឺមៀ នៅរុស្ស៊ី នាពេលកន្លងទៅ (រូបភាព៖ AFP)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការហៅទូរសព្ទនេះ ធ្វើឡើងរវាងលោក Kim Hong-kyun អនុរដ្ឋមន្ត្រីក្រសួងការបរទេសក្រុងសេអ៊ូល និងលោក Kurt Campbell អនុរដ្ឋមន្ត្រីក្រសួងការបរទេសក្រុងវ៉ាស៊ីតោន។ កូរ៉េខាងត្បូង បាននិយាយថា ដំណើរទស្សនកិច្ចរបស់លោក ពូទីន មិនគួរបង្កើតឲ្យមានកិច្ចសហប្រតិបត្តិការយោធាកាន់តែស៊ីជម្រៅថែមទៀតទេរវាងប្រទេសរុស្ស៊ី និងកូរ៉េខាងជើង។

កាលពីថ្ងៃពុធសប្ដាហ៍នេះ មន្ត្រីជាន់ខ្ពស់នៃការិយាល័យប្រធានាធិបតីកូរ៉េខាងត្បូង បានលើកឡើងថា លោក ពូទីន ទំនងជាធ្វើទស្សនកិច្ចនៅកូរ៉េខាងជើង នារយៈពេលប៉ុន្មានថ្ងៃខាងមុខទៀត បើទោះជាមិនមានការប្រកាសជាផ្លូវការណាមួយអំពីជំនួបនេះក៏ដោយ។ ទន្ទឹមគ្នានេះដែរ កាសែតរុស្ស៊ី Vedomosti ក៏បានរាយការណ៍កាលពីថ្ងៃចន្ទកន្លងទៅដែរថា ជំនួបរវាងរុស្ស៊ី-កូរ៉េខាងជើង នឹងកើតឡើងពិតប្រាកដមែន ខណៈមន្ត្រីអ្នកមុខអ្នកការនៅប្រទេសទាំង២កំពុងញាប់ដៃញាប់ជើងរៀបចំជំនួបនេះឡើង។

លោក Kurt Campell បានអះអាងថា អាមេរិកនឹងជួយពង្រឹងកិច្ចសហប្រតិបត្តិការជាមួយកូរ៉េខាងត្បូងបន្ថែមទៀត ដើម្បីបង្ក្រាបជម្លោះ និងអស្ថិរភាពនៅក្នុងតំបន់ ដែលនឹងអាចកើតឡើងដោយប្រការណាមួយ ក្រោយពីជំនួបដ៏កម្ររបស់រុស្ស៊ីនៅលើទឹកដីកូរ៉េខាងជើង។ លោក ថា អាមេរិកដឹងច្បាស់ណាស់អំពីអ្វីដែលកូរ៉េខាងជើងបានផ្ដល់ឲ្យរុស្ស៊ីនាពេលកន្លងមក ជាពិសេសពាក់ព័ន្ធនឹងសង្គ្រាមរុស្ស៊ីនៅអ៊ុយក្រែន។ យ៉ាងណាមិញ លោកបន្តថា ចំពោះអ្វីដែលរុស្ស៊ីផ្ដល់ឲ្យកូរ៉េខាងជើង គឺនៅជាភាពស្រពិចស្រពិលនៅឡើយទេ ដែលបង្កជាសេចក្ដីគួរឲ្យព្រួយបារម្ភ និងត្រូវតាមដានឲ្យហ្មត់ចត់បំផុត៕

ដោយ៖ ឈាង