ព័ត៌មានជាតិ

រដ្ឋមន្ត្រីសុខាភិបាល ៖ Smile Cambodia បានលះបង់យ៉ាងធំធេងក្នុងការជួយវះកាត់ជូនអ្នកជំងឺមាត់ឆែប និងពិការមុខមាត់ផ្សេងៗ

បានផុស

២ years មុន

នៅ

ថ្ងៃសៅរ៍ ១៥ មិថុនា ២០២៤

ដោយ

លោកសាស្ត្រាចារ្យ ឈាង រ៉ា រដ្ឋមន្ត្រីក្រសួងសុខាភិបាល បានកោតសរសើរដល់អង្គការស្នាមញញឹមកម្ពុជា (Smile Cambodia) ចំពោះការលះបង់ទាំងកម្លាំងកាយ កម្លាំងចិត្ត ពិសេសធនធានថវិកា ក្នុងការចូលរួមផ្តល់សេវាវះកាត់ជូនដល់អ្នកជំងឺដែលមានបញ្ហាមាត់ឆែប ក្រអូមមាត់ឆែប និងពិការភាពមុខមាត់ផ្សេងៗ និងទម្រង់មុខខុសធម្មតា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅក្នុងជំនួបពិភាក្សាការងារជាមួយលោក ចាន់ កុកចយ ជាអនុប្រធាន និងជានាយកប្រតិបត្តិអង្គការស្នាមញញឹមកម្ពុជា កាលពីថ្ងៃទី ១៤ មិថុនា លោករដ្ឋមន្ត្រី បានសម្តែងនូវការពេញចិត្ត អំពីអត្ថប្រយោជន៍ នៃការផ្តល់លទ្ធភាពទទួលបានការថែទាំវះកាត់ប្រកបដោយសុវត្ថិភាព និងប្រសិទ្ធភាព សម្រាប់ប្រជាពលរដ្ឋកម្ពុជាដែលមានមាត់ឆែប ក្រអូមមាត់ និងពិការភាពមុខមាត់ផ្សេងៗ និងបានសម្តែងការគាំទ្រអស់ពីចិត្តចំពោះបេសកកម្មរបស់អង្គការស្នាមញញឹមកម្ពុជា។

លោករដ្ឋមន្ត្រី បានថ្លែងអំណរគុណយ៉ាងជ្រាលជ្រៅជូនដល់គណៈប្រតិភូ និងសូមស្វាគមន៍ចំពោះកិច្ចសហការបន្ថែមលើភាពជាដៃគូសម្រាប់កម្មវិធីនាពេលអនាគត និងភាពជាដៃគូ ដើម្បីបន្តពង្រីកលទ្ធភាពបន្ថែមរបស់អង្គការស្នាមញញឹមកម្ពុជា ដើម្បីចូលរួមចំណែកជាមួយនឹងកិច្ចខិតខំប្រឹងប្រែងរបស់ក្រសួងសុខាភិបាល នៃព្រះរាជាណាចក្រកម្ពុជា ក្នុងការលើកកម្ពស់សុខុមាលភាពរបស់ប្រជាជនកម្ពុជា ដើម្បីឈានទៅសម្រេចបាននូវការគ្របដណ្ដប់សុខភាពជាសកល ស្របតាមផែនការយុទ្ធសាស្ត្របញ្ចកោណ នៃរាជរដ្ឋាភិបាលអាណត្តិទី ៧ ក្រោមការដឹកនាំប្រកបដោយគតិបណ្ឌិតរបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា៕

អត្ថបទ ៖ សំអឿន