Connect with us

ព័ត៌មានអន្ដរជាតិ

រុស្ស៊ី ចង្អុលចំមុខអាមេរិក ថែមគំរាមសងសឹកឥតប្រណី ក្រោយការវាយប្រហារនៅ គ្រីមៀ

បានផុស

នៅ

តាមការចុះផ្សាយរបស់ RT, ប្រទេសរុស្សី បានស្តីបន្ទោសអាមេរិកចំៗ និងគំរាមសងសឹកមិនប្រណីដៃ ចំពោះការវាយប្រហារដោយមីស៊ីលរបស់អ៊ុយក្រែន លើទីក្រុង Sevastopol ក្នុងឧបទ្វីបគ្រីមៀ កាលពីថ្ងៃអាទិត្យទី២៣ខែមិថុនាឆ្នាំ២០២៤ ដែលបណ្តាលឲ្យមនុស្សចំនួន៤នាក់ បាត់បង់ជីវិតរួមទាំងកុមារ២នាក់ផងដែរ ខណៈប្រហែល១៥០នាក់ទៀត រងរបួស។

(រូបថត៖ AP)
សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រសួងការពារជាតិរុស្ស៊ីចេញសេចក្តីប្រកាសថា មីស៊ីលដែលអ៊ុយក្រែនប្រើនោះ គឺជាប្រភេទ ATACMS ផ្គត់ផ្គង់ដោយសហរដ្ឋអាមេរិក ហើយការវាយប្រហារនោះទៀតសោត គឺត្រូវបានរៀបចំឡើងដោយអ្នកឯកទេសអាមេរិក តែម្តង។

ស្របពេលជាមួយគ្នានោះ អ្នកនាំពាក្យវិមានក្រឹមឡាំង លោក Dmitry Peskov បានហៅការវាយប្រហារនោះថា ជាទង្វើព្រៃផ្សៃរបស់សហរដ្ឋអាមេរិកដែលសម្លាប់កុមាររុស្ស៊ី។ លោកក៏បានរម្លឹកទៅការព្រមានរបស់លោកប្រធានាធិបតីរុស្ស៊ី វ្ល៉ាឌីមៀរ ពូទីន ផងដែរ ដែលថា ទីក្រុងមូស្គូនឹងសងសឹកចំពោះប្រទេសណាក៏ដោយ ឲ្យតែជួយអាវុធដល់អ៊ុយក្រែន បាញ់ចូលដីរុស្ស៊ី។

(រូបថត៖ EPA)

តាមអ្វីដែលទីក្រុងមូស្គូបញ្ជាក់, ការស្លាប់និងរបួសមនុស្សកាលពីថ្ងៃអាទិត្យ គឺបណ្តាលមកពីបំណែកមីស៊ីលធ្លាក់ពីលើអាកាស ក្រោយខែលការពាររបស់ខ្លួននៅគ្រីមៀ ស្ទាក់ចាប់បានមីស៊ីលចំនួន៥គ្រាប់ មានបំពាក់ក្បាលគ្រាប់បែកចង្កោមដែលបាញ់ដោយកងកម្លាំងអ៊ុយក្រែន។

ពាក់ព័ន្ធបញ្ហានេះ ក្រសួងការបរទេសរុស្ស៊ី ក៏បានកោះហៅឯកអគ្គរដ្ឋទូតសហរដ្ឋអាមេរិកលោកស្រី Lynne Tracy មកនិយាយគ្នាឲ្យដឹងសខ្មៅផងដែរ។

(រូបថត៖ Lockheed Martin)

សូមបញ្ជាក់ អាមេរិក​ បាន​ផ្គត់ផ្គង់​មី​ស៊ី​ល ATACMS ឲ្យ​អ៊ុយ​ក្រែ​ន​អស់​រយៈពេល​ជាង​១​ឆ្នាំ​មក​ហើយ ខណៈក្រុមហ៊ុនផលិត Lockheed Martin បានឲ្យដឹងថា ប្រព័ន្ធនេះ មានសមត្ថភាពវាយប្រហារគោលដៅ នៅចម្ងាយឆ្ងាយរហូតដល់ ៣០០គីឡូម៉ែត្រឯណោះ។

ដោយឡែក បើនិយាយពីតួលេខមនុស្សស្លាប់វិញ, បេសកកម្មឃ្លាំមើលសិទ្ធិមនុស្សរបស់អង្គការសហប្រជាជាតិប្រចាំនៅអ៊ុយក្រែន បានបង្ហាញថា គិតត្រឹមពេលនេះ មានជនស៊ីវិលយ៉ាងតិច ១០ ០០០នាក់ហើយ ដែលត្រូវបានសម្លាប់ ចាប់តាំងពីប្រទេសរុស្ស៊ីបើកប្រតិបត្តិការសឹកនៅអ៊ុយក្រែន ក្នុងខែកុម្ភៈឆ្នាំ២០២២។ យ៉ាងណាក្តី តួលេខពិតប្រាកដ ត្រូវបានគេសន្និដ្ឋានថា ខ្ពស់ជាងនេះឆ្ងាយណាស់៕

អត្ថបទ៖ សុខ សុវណ្ណ

ចុចអាន៖ អ៊ុយក្រែន ប្រើដ្រូននិងគ្រាប់រ៉ុក្កែតវាយ​ប្រហាររុស្ស៊ី ស្លាប់និងរបួសជាច្រើននាក់

Helistar Cambodia - Helicopter Charter Services
Sokimex Investment Group
Sokha Hotels

ព័ត៌មានពេញនិយម