ព័ត៌មានអន្ដរជាតិ

ថៃរំពឹងទេសចរជាង៣លាននាក់ពីឥណ្ឌា និងតៃវ៉ាន់ ដោយបន្តការលើកលែងទិដ្ឋាការ

បានផុស

១១ ខែ មុន

នៅ

ថ្ងៃព្រហស្បតិ៍ ២៥ កក្កដា ២០២៤

ដោយ

ប្រទេសថៃរំពឹងពីការហូរចូលនៃភ្ញៀវទេសចរឥណ្ឌា និងតៃវ៉ាន់ប្រមាណជាង ៣ លាននាក់នៅឆ្នាំ ២០២៤ តាមរយៈការបន្តគោលនយោបាយលើកលែងទិដ្ឋាការជាមួយប្រទេស និងដែនដីទាំង២ រហូតដល់ថ្ងៃទី១១ ខែវិច្ឆិកា ដោយអាចឱ្យភ្ញៀវទេសចរស្នាក់នៅក្នុងប្រទេសរបស់ខ្លួនរហូតដល់ ៦០ ថ្ងៃ។ នេះបើតាមការចុះផ្សាយរបស់កាសែត The Thaiger។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អាជ្ញាធរទេសចរណ៍ថៃ (TAT) បានរាយការណ៍ថា ប្រទេសថៃបានយល់ព្រមរួចហើយលើកម្មវិធីលើកលែងទិដ្ឋាការទៅវិញទៅមកប្រចាំឆ្នាំជាមួយតៃវ៉ាន់ និងឥណ្ឌា ដែលគ្រោងនឹងចាប់ផ្តើមក្នុងពេលឆាប់ៗនេះ។

នាយកការិយាល័យ TAT ប្រចាំក្រុងតៃប៉ិ លោក Sarima Chindamat បានបង្ហាញទំនុកចិត្តថា ចំនួននៃការមកដល់របស់ភ្ញៀវទេសចរតៃវ៉ាន់ អាចកើនឡើងដល់១លាននាក់នៅឆ្នាំនេះ ដែលតួលេខនៃការរំពឹងទុកនេះ លើសពីតួលេខឆ្នាំ ២០១៩ ដែលភ្ញៀវទេសចរតៃវ៉ាន់ ប្រមាណ ៧៨១ ៦៧៤ នាក់ បានទៅលេងប្រទេសថៃ។

លោកនិយាយបន្ថែមយ៉ាងដូច្នេះថា៖ «ក្នុងអំឡុងឆមាសទី១នៃឆ្នាំ ២០២៤ គោលនយោបាយទិដ្ឋាការបានទាក់ទាញភ្ញៀវទេសចរតៃវ៉ាន់ចំនួន ៥៣៣ ០០០ នាក់ ដោយកើនឡើង ៣៤ ភាគរយ បើធៀបនឹងរយៈពេលដូចគ្នាក្នុងឆ្នាំ ២០១៩ ដែលមានចំនួន ៣៩៦ ០០០ នាក់»។

ថៃក៏ពង្រីកមហិច្ឆតារបស់ខ្លួន ក្នុងការទាក់ទាញភ្ញៀវទេសចរឥណ្ឌាឱ្យបានជាង ២ លាននាក់ផងដែរក្នុងឆ្នាំនេះ។ នាយកការិយាល័យ TAT ប្រចាំក្រុងម៉ុមបៃ លោក Isada Saovaros បាននិយាយថា៖ «ក្នុងឆមាសទី១នៃឆ្នាំនេះ ថៃបានស្វាគមន៍ភ្ញៀវទេសចរឥណ្ឌាចំនួន ១,០៤ លាននាក់ ដោយភ្ញៀវម្នាក់បានចំណាយជាមធ្យម ៣៨ ០០០ បាត (១ ០០០ ដុល្លារអាមេរិក)/ដំណើរ»។

លោក Saovaros បានលើកឡើងពីឱកាសទាក់ទាញភ្ញៀវទេសចរឥណ្ឌា ដោយថាថៃជាកន្លែងរៀបចំកិច្ចប្រជុំផ្សេងៗ សម្រាប់នាំបុគ្គលិកក្រុមហ៊ុនធ្វើដំណើរកម្សាន្ត និងវិស្សមកាលជាលក្ខណៈគ្រួសារជាដើម។

គួរគូសបញ្ជាក់ថា រដ្ឋាភិបាលថៃបានខិតខំប្រឹងប្រែងទាក់ទាញភ្ញៀវទេសចរ ដើម្បីជួយជំរុញកំណើនសេដ្ឋកិច្ចដែលកំពុងដើរអូសជើង ក្នុងមហិច្ឆតាទាក់ទាញភ្ញៀវបរទេសឱ្យបាន ៣៥ លាននាក់ក្នុងឆ្នាំនេះ។ ក្នុងជំហានចុងក្រោយដើម្បីសម្រេចគោលដៅនេះ ថៃកាលពីសប្ដាហ៍មុន បានពង្រីកបញ្ជីលើកលែងទិដ្ឋាការចំនួន ៦០ ថ្ងៃ សម្រាប់ប្រមាណ ៩៣ ប្រទេស៕