ព័ត៌មានអន្ដរជាតិ

ថៃព្យាករការខាតបង់ ៤០ ប៊ីលានបាត ក្នុងវិស័យទេសចរណ៍ ដោយសារជម្លោះមជ្ឈិមបូព៌ា

បានផុស

៤ ខែ មុន

នៅ

ថ្ងៃចន្ទ ១៦ មីនា ២០២៦

ដោយ

ថៃអាចនឹងខាតបង់ប្រាក់ចំណូលពីវិស័យទេសចរណ៍ជាង ៤០ ប៊ីលានបាត (ប្រហែល ១២៥ លានដុល្លារ) ពីជម្លោះនៅមជ្ឈិមបូព៌ាពាក់ព័ន្ធអ៊ីស្រាអែល សហរដ្ឋអាមេរិក និងអ៊ីរ៉ង់ ក្រោមសេណារីយ៉ូដ៏អាក្រក់បំផុតដែលការបិទដែនអាកាសបន្តបិទរយៈពេល ៨ សប្ដាហ៍។ នេះបើតាមការចុះផ្សាយរបស់កាសែតបាងកកប៉ុស្តិ៍។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រសួងទេសចរណ៍ និងកីឡាថៃ បានឱ្យដឹងពីការប៉ាន់ស្មាននេះ កាលពីដើមសប្ដាហ៍មុន ប៉ុន្តែមកទល់ថ្ងៃចន្ទសប្ដាហ៍នេះ (១៦ មីនា) ដែនអាកាសនៅជុំវិញតំបន់ជម្លោះនៅតែបន្តបិទ ហើយអាកាសចរណ៍ស៊ីវិលនៅតែទាន់អាចដំណើរការដូចដើម។

លោកស្រី Natthriya Thaweevong លេខាធិការអចិន្ត្រៃយ៍ក្រសួងទេសចរណ៍ និងកីឡា និយាយថា អ្នកធ្វើដំណើរមកពីមជ្ឈិមបូព៌ា និងអឺរ៉ុប ត្រូវបានរារាំងយ៉ាងខ្លាំងដោយការបិទដែនអាកាស ដោយសារជើងហោះហើរជាច្រើនមិនអាចដំណើរការបាន។

ក្រុមហ៊ុនអាកាសចរណ៍សំខាន់នៅតំបន់ឈូងសមុទ្រពែរ្សដូចជា Emirates និង Etihad Airways បានបន្តជើងហោះហើរតែមួយចំនួនតូចប៉ុណ្ណោះ។

ក្រសួងបានវាយតម្លៃផលប៉ះពាល់ទេសចរណ៍ដោយប្រើសេណារីយ៉ូ ៣ យ៉ាង៖ ប្រសិនបើដែនអាកាសមជ្ឈិមបូព៌ាត្រូវបិទរយៈពេល ៣, ៤, និង ៨ សប្តាហ៍។

ប្រសិនបើដែនអាកាសនៅតែបិទរយៈពេល ៨ សប្តាហ៍ ឬយូរជាងនេះ ចំនួនភ្ញៀវទេសចរបរទេសអាចធ្លាក់ចុះជាងកន្លះលាននាក់ ឬជាង ៥៩៥ ០០០ នាក់ ដែលបណ្ដាលការខាងបង់ប្រាក់ ៤០,៩ ប៊ីលានបាត។

លោកស្រី Natthriya បាននិយាយថា ក្រុមហ៊ុនអាកាសចរណ៍អាចនឹងដំឡើងថ្លៃសំបុត្រក្នុងរដូវក្តៅ ដោយសារតែតម្លៃប្រេងឡើងខ្ពស់។ បញ្ហានេះ អាចប៉ះពាល់ដល់ភ្ញៀវទេសចរមកពីគ្រប់ទីផ្សារទាំងអស់ ជាពិសេសអឺរ៉ុប មជ្ឈិមបូព៌ា។ ក្រៅពីនោះ អតិផរណាខ្ពស់នៅអឺរ៉ុបអាចកាត់បន្ថយចំនួនទឹកប្រាក់ដែលជនជាតិអឺរ៉ុបអាចចំណាយលើការធ្វើដំណើរ។

លោកស្រីបន្តថា ថៃមានគម្រោងផ្តោតការយកចិត្តទុកដាក់បន្ថែមលើទីផ្សារជិតៗដូចជាម៉ាឡេស៊ី ឥណ្ឌា និងកូរ៉េខាងត្បូងជាដើម ខណៈបន្តថា ជម្លោះមជ្ឈិមបូព៌ាផ្តល់ឱកាសមួយដើម្បីផ្សព្វផ្សាយប្រទេសថៃជាមជ្ឈមណ្ឌលអាកាសចរណ៍ ដោយភ្ជាប់ជើងហោះហើរពីអាស៊ី និងអាស៊ីអាគ្នេយ៍ទៅអឺរ៉ុប៕