ម៉ាឡេស៊ីវ៉ាដាច់ថៃ ២ ឆ្នាំ ជាប់ៗគ្នា លើចំនួនភ្ញៀវទេសចរបរទេស

ម៉ាឡេស៊ីបានវ៉ាដាច់ថៃ២ឆ្នាំជាប់ៗគ្នា ក្លាយជាប្រទេសនៅអាស៊ីអាគ្នេយ៍ដែលទទួលបាន​ភ្ញៀវទេសចរបរទេសច្រើនជាងគេបំផុតកាលពីឆ្នាំ ២០២៥​ និងឆ្នាំ ២០២៤ ដោយសារតែគោលនយោបាយទិដ្ឋាការដែលអាចបត់បែនបាន និងការកែលម្អហេដ្ឋារចនាសម្ព័ន្ធរបស់ខ្លួន ខណៈថៃប្រឈមនឹង​បញ្ហាផ្សេងៗ រួមទាំងកង្វល់សុវត្ថិភាព។

​នាយកដ្ឋាន​ទេសចរណ៍ម៉ាឡេស៊ី ​ចំណុះឱ្យក្រសួងទេសចរណ៍ សិល្បៈ និងវប្បធម៌ បានឱ្យដឹងថា ប្រទេសម៉ាឡេស៊ីបានស្វាគម​ភ្ញៀវទេសចរបរទេសចំនួន ៣៨,៣ លាននាក់ក្នុងរយៈពេល ១១ ខែ ដើម​ឆ្នាំ ២០២៥ ដែលលើសចំនួនសរុបនៃភ្ញៀវក្នុងឆ្នាំ ២០២៤ ទាំងមូល។ ឆ្នាំ ២០២៤ ម៉ាឡេស៊ីទទួលភ្ញៀវទេសចរបរទេសប្រមាណ ៣៨ លាននាក់ ដោយវ៉ាដាច់ប្រទេសនៅអាស៊ានទាំងអស់​។

ដោយឡែក​ថៃឯណោះវិញ ពេញមួយឆ្នាំ ២០២៥ កន្លងទៅ បាន​ទទួលភ្ញៀវទេសចរបរទេសប្រមាណ ៣២,៩ លាន​នាក់ ដោយធ្លាក់ចុះជាង ៧% ធៀបនឹង​ឆ្នាំ ២០២៤ ដែលថៃទទួល​ភ្ញៀវបរទេសជាង ៣៥ លាននាក់។ បើមិនរាប់សម័យកូវីដ១៩ចូល នេះគឺជាការធ្លាក់ចុះភ្ញៀវអន្តរជាតិប្រចាំឆ្នាំជាលើកដំបូងហើយ សម្រាប់ថៃ ក្នុងរយៈពេលជាង១ទសវត្សរ៍។

ថៃធ្លាប់តែជាមជ្ឈមណ្ឌលទេសចរណ៍នៅតំបន់អាស៊ីអាគ្នេយ៍ ដែលទទួលបាន​ភ្ញៀវទេសចរច្រើនជាងគេ យ៉ាងណាមិញ ឆ្នាំ ២០២៥ កន្លងទៅ ប្រទេសនេះបាន​ប្រឈមមុខនឹង​បញ្ហាបន្តកន្ទុយគ្នាមិនដាច់ រាប់តាំងពីដើម ដល់ចុងឆ្នាំ ដែលប៉ះពាល់ពាល់ដល់ទំនុកចិត្តភ្ញៀវ។ ក្នុងនោះរួមមាន​ទាំងកង្វល់សុវត្ថិភាពពាក់ព័ន្ធការជួញដូរមនុស្សលើជនជាតិចិន និងការគំរាមកំហែងភេរវកម្ម​ ជម្លោះព្រំដែនជាមួយកម្ពុជា ទឹកជំនន់ដ៏មហន្តរាយទូទាំងប្រទេស គ្រោះរញ្ជួយដី ខណៈភាពស្រពេចស្រពិលនៃសេដ្ឋកិច្ចសកល បានប៉ះពាល់ដល់ការចំណាយរបស់ភ្ញៀវបរទេស។

លើសពីនេះ ថៃត្រូវរងការប្រកួតប្រជែងកាន់តែខ្លាំងក្លាពីប្រទេសក្នុងតំបន់ ជាពិសេសវៀតណាម និងម៉ាឡេស៊ី ដែលកំពុងលេចធ្លោក្លាយជាគោលដៅទេសចរណ៍កំពូលប្រចាំតំបន់។

ចំពោះម៉ាឡេស៊ី កាលពីខែឧសភាឆ្នាំ ២០២៥ ប្រទេសនេះ​បានប្រកាស​ពីការបន្តគោលនយោបាយលើកលែងទិដ្ឋាការ​សម្រាប់អ្នកធ្វើដំណើរជនជាតិចិន​ ក្នុងរយៈពេល ៥ ឆ្នាំទៀត ​​ខណៈភ្ញៀវទេសចរទៅថៃធ្លាក់ចុះជាគំហុកដោយសារក្ដីបារម្ភសុវត្ថិភាព។ ក្រៅពីនេះ រដ្ឋាភិបាលម៉ាឡេស៊ីក៏បានពង្រីកផ្លូវហោះហើរអន្តរជាតិ និងធ្វើឱ្យប្រសើរឡើងនូវស្ថានីយទទួលអ្នកដំណើរលេខ ១ នៃអាកាសយានដ្ឋានអន្តរជាតិកូឡាឡាំពួរផងដែរ៕