ប្រទេស​ច្រើន​នៅ​អាហ្វ្រិក​រងគ្រោះទឹកជំនន់ ឯប្រទេស​ឡេសូតូ​​ជួប​គ្រោះរាំងស្ងួតខ្លាំង​

ទាំងប្រទេសស៊ូដង់ និងប្រទេសឆាដ បានរងគ្រោះដោយទឹកជំនន់ ខណៈដែលប្រទេសឡេសូតូ ជាប្រទេសមួយផ្សេងទៀតនៅក្នុងទ្វីបអាហ្រ្វិក ទទួលរងផលប៉ះពាល់ដោយគ្រោះរាំងស្ងួតទៅវិញ។ នេះបើយោងតាមការចេញផ្សាយរបស់សារព័ត៌មាន​ CGTN នៅថ្ងៃទី១០ខែកញ្ញានេះ។

លោក Stephane Dujarric ប្រធានអ្នកនាំពាក្យ​របស់​អគ្គលេខាធិការ​​​​អង្គការ​សហប្រជាជាតិ បានប្រាប់​សន្និសីត​សារព័ត៌មាន​ថា ការិយាល័យអង្គការសហប្រជាជាតិសម្រាប់ការសម្របសម្រួលកិច្ចការមនុស្សធម៌ (OCHA) បាន​ព្រមានថាភ្លៀងធ្លាក់ខ្លាំង និងទឹកជំនន់បាននិងកំពុងប៉ះពាល់ដល់ប្រជាជនប្រហែលកន្លះលាននាក់នៅក្នុងរដ្ឋ​​ធានី Darfur​​ខាងត្បូង ​នៅ​​សមុទ្រ​ក្រហម ​​ទន្លេនីល និងភាគខាងជើងស៊ូដង់ចាប់តាំងពីចុងខែមិថុនា។

ទឹកជំនន់ដ៏ធ្ងន់ធ្ងរកំពុងធ្វើឱ្យស្ថានភាពវិបត្តិមនុស្សធម៌កាន់តែធ្ងន់ធ្ងរនៅក្នុងប្រទេសស៊ូដង់ ខណៈនៅក្នុងតំបន់ដែលប្រឈមនឹងគ្រោះទុរ្ភិក្ស រួមទាំងនៅ El Fasher រដ្ឋធានី Darfur​ ខាងជើង​ ដោយមនុស្សប្រហែល១២៤០០០ នាក់បានរងផលប៉ះពាល់ដោយភ្លៀងធ្លាក់ខ្លាំង។

ជាមួយគ្នានេះ ទឹកជំនន់និងស្ថានភាព​ទឹកនៅទ្រឹងក៏កំពុងបង្កើនហានិភ័យនៃការរីករាលដាលនៃជំងឺអាសន្នរោគ ខណៈមានករណីសង្ស័យថា មាន​ជំងឺអាសន្នរោគជិត២៩០០ករណីត្រូវបានរាយការណ៍ចាប់តាំងពីមានការចាប់ផ្តើមនៃការផ្ទុះឡើងកាលពីពាក់កណ្តាលខែសីហា។

កាលពីសប្តាហ៍មុន អង្គការជំនួយ​មនុស្ស​ធម៌​បានផ្តល់អាហារ​ និង​ការ​ព្យាបាលសង្គ្រោះអាយុជីវិតដើម្បីព្យាបាលកុមារចំនួន៦០០០នាក់ដែលរងគ្រោះ​ដោយសារ​កង្វះអាហារូបត្ថម្ភធ្ងន់ធ្ងរនៅក្នុងទីក្រុង Nyala ក្នុងភាគខាងត្បូង Darfur ។

នៅប្រទេសឆាដ ​អង្គការ​ OCHA បាននិយាយថា ទឹកជំនន់នៅតែបន្តកើតមាននៅទូទាំងប្រទេស។ យោងតាមអាជ្ញាធរ យ៉ាងហោចណាស់មនុស្ស ៣៤០នាក់ត្រូវបានសម្លាប់ មនុស្សជិត១,៥លាននាក់កំពុងរងផលប៉ះពាល់ដោយទឹកជំនន់ ហើយផ្ទះជាង១៦ម៉ឺន​ខ្នងត្រូវបានបំផ្លាញ។

ទឹកជំនន់ក៏កំពុងប៉ះពាល់ដល់វិស័យកសិកម្មផងដែរ ហើយមនុស្សជិត៣,៤លាននាក់កំពុងប្រឈមនឹងការអត់ឃ្លានធ្ងន់ធ្ងរ ខណៈទីភ្នាក់ងារអង្គការសហប្រជាជាតិ និងដៃគូកំពុងផ្តល់អាហារ និងអាហារូបត្ថម្ភ និងកំពុងប្រមូលមូលនិធិដើម្បីគាំទ្រដល់​ការឆ្លើយតប​ទឹក​ជំនន់នៅក្នុងប្រទេសឆាដពី៥លានដុល្លារទៅ៨លានដុល្លារ។

ទន្ទឹមនឹងនេះ OCHA បានរាយការណ៍ថា ស្ថានភាពអសន្តិសុខស្បៀងនៅក្នុងប្រទេសឡេសូតូ នៅភាគខាងត្បូងទ្វីបអាហ្រ្វិកកំពុងកាន់តែយ៉ាប់យ៉ឺន បន្ទាប់ពីគ្រោះរាំងស្ងួតជាប្រវត្តិសាស្ត្រដែលបណ្តាលមកពីឥទ្ធិពល អែលនីញ៉ូ​។ ជាមធ្យម ផលិតកម្មកសិកម្មនៅក្នុងប្រទេសបានថយចុះមួយភាគបី ហើយជិតមួយភាគបីនៃចំនួនប្រជាជន ឬ ៧០ម៉ឺន​នាក់ កំពុងប្រឈមមុខនឹងអសន្តិសុខស្បៀងនៅក្នុងប៉ុន្មានខែខាងមុខនេះ។

ដើម្បីឆ្លើយតបនឹងគ្រោះមហន្តរាយនេះ អ្នកសម្របសម្រួលជំនួយសង្គ្រោះបន្ទាន់របស់អង្គការសហប្រជាជាតិស្តីទីបានបែងចែកប្រាក់ចំនួន​២លានដុល្លារជួយសម្រួលដល់បញ្ហាគ្រោះរាំងស្ងួតនេះ ស្របពេលជំនួយការអគ្គលេខាធិការ និងអ្នកសម្របសម្រួលវិបត្តិអាកាសធាតុ លោកស្រី Reena Ghelani ថ្មីៗនេះបានធ្វើទស្សនកិច្ចប្រទេសនេះដើម្បីវាយតម្លៃផលប៉ះពាល់នៃគ្រោះរាំងស្ងួត និងអំពាវនាវឱ្យមានការគាំទ្រពីអន្តរជាតិបន្ថែមទៀត៕

អត្ថបទ៖ ប៊ុន សុភាព