មេ​ណាតូ ប្រាប់​ថា ប្រទេស​នីមួយៗត្រូវ​សម្រេច​ចិត្ត​រៀង​ខ្លួន​រឿង​​ឲ្យ​អ៊ុយក្រែន​ប្រើ​មីស៊ីល​ចម្ងាយ​ឆ្ងាយ

ប្រមុខអង្គការណាតូ លោក Jens Stoltenberg បាននិយាយកាលពីថ្ងៃចន្ទថា លោកស្វាគមន៍កិច្ចពិភាក្សាស្តីពីការប្រើប្រាស់មីស៊ីលរយៈចម្ងាយឆ្ងាយរបស់អ៊ុយក្រែន ដើម្បីវាយប្រហារលើទឹកដីរុស្ស៊ី ប៉ុន្តែការសម្រេចចិត្តណាមួយលើបញ្ហានេះ នឹងត្រូវធ្វើឡើង​រៀងៗ​ខ្លួន​ដោយ​ប្រទេស​សម្ព័ន្ធមិត្តនីមួយៗ។

ប្រធានាធិបតីអ៊ុយក្រែន លោក Volodymyr Zelenskiy បានអង្វរសម្ព័ន្ធមិត្តជាច្រើនខែ ដើម្បីអនុញ្ញាតឲ្យ​អ៊ុយក្រែន​បាញ់មីស៊ីលលោកខាងលិច រួមទាំងមីស៊ីល ATACMS រយៈចម្ងាយឆ្ងាយរបស់សហរដ្ឋអាមេរិក និងមីស៊ីល Storm Shadows របស់ចក្រភពអង់គ្លេស ចូលជ្រៅទៅក្នុងប្រទេសរុស្ស៊ី ដើម្បីរារាំង​សមត្ថភាពវាយប្រហាររបស់ទីក្រុងមូស្គូ។

នាយករដ្ឋមន្ត្រីអង់គ្លេស លោក Keir Starmer និងប្រធានាធិបតីអាមេរិក លោក Joe Biden បាន ជួបពិភាក្សាគ្នានៅទីក្រុងវ៉ាស៊ីនតោនកាលពីថ្ងៃសុក្រ​សប្ដាហ៍​មុន​​ថាតើត្រូវអនុញ្ញាតឲ្យ​ទីក្រុង​កៀវប្រើប្រាស់មីស៊ីល​រយៈចម្ងាយឆ្ងាយប្រឆាំងនឹងគោលដៅនៅក្នុងប្រទេសរុស្ស៊ីដែរឬក៏​អត់។ យ៉ាង​ណា លទ្ធផល​នៃ​កិច្ច​ពិភាក្សា​នេះ​ពុំ​ត្រូវ​បាន​ប្រកាស​នោះ​ទេ។

លោក Stoltenberg បានប្រាប់ថា៖ «ខ្ញុំស្វាគមន៍ចំពោះការអភិវឌ្ឍ និងការសម្រេចចិត្តទាំងនេះ ប៉ុន្តែវាសម្រាប់សម្ព័ន្ធមិត្ត​នីមួយៗ​ដើម្បីធ្វើការសម្រេចចិត្តចុងក្រោយ។ សម្ព័ន្ធមិត្តមានគោលនយោបាយផ្សេងៗគ្នាលើរឿងនេះ»។

មន្ត្រីអាមេរិកមួយចំនួន​បាន​បង្ហាញ​ពី​ការងឿងឆ្ងល់យ៉ាងខ្លាំងថា​តើ​ការអនុញ្ញាតឲ្យមានការប្រើប្រាស់មីស៊ីល​​នេះនឹង​​អាច​បង្ក​ឲ្យ​មានភាពខុសប្លែកគ្នា​ខ្លាំងនៅក្នុងការប្រយុទ្ធរបស់ទីក្រុងកៀវប្រឆាំងនឹងការឈ្លានពានរបស់រុស្ស៊ី​ដែរ​ឬ​ក៏​យ៉ាង​ណា។

ពាក់ព័ន្ធ​នឹង​ការ​ស្នើ​សុំ​របស់​អ៊ុយក្រែន ប្រធានាធិបតី​រុស្ស៊ី លោក វ្ល៉ាឌីមៀរ ពូទីន បាននិយាយថា លោកខាងលិចនឹង​ផ្ទុះ​សង្គ្រាម​ជាមួយ​​ក្រុង​មូស្គូ​ដោយផ្ទាល់ ប្រសិនបើអនុញ្ញាតឲ្យ​អ៊ុយក្រែនវាយប្រហារដោយមីស៊ីលរយៈចម្ងាយឆ្ងាយដែលផលិតដោយលោកខាងលិច។

នៅពេលសួរអំពីការសងសឹករបស់រុស្ស៊ី ​ប្រមុខ​អង្គការ​ណាតូ បានប្រាប់​ថា៖ «គ្មានជម្រើស​ណា​ដែលគ្មានហានិភ័យក្នុងសង្គ្រាម​នោះទេ»។ លោកបានបន្ថែមថា៖ «ប៉ុន្តែខ្ញុំបន្តជឿថា ហានិភ័យដ៏ធំបំផុតសម្រាប់យើង សម្រាប់ចក្រភពអង់គ្លេស សម្រាប់អង្គការណាតូ នឹងមានប្រសិនបើប្រធានាធិបតី ពូទីន ឈ្នះនៅអ៊ុយក្រែន»៕

ដោយ៖ ឈាង