ទេសចរអន្តរជាតិមកកម្សាន្ត នៅ​រមណីយដ្ឋាន​ប្រវត្តិសាស្រ្តភ្នំសំពៅ​មួយ​ថ្ងៃ ៥០ ទៅ ៦០ នាក់

ក្រោយពីអាកាសធាតុបាន​ល្អប្រសើរ គេសង្កេតឃើញនៅរមណីយដ្ឋានប្រវត្តិសាស្រ្តភ្នំសំពៅ មានកំណើនភ្ញៀវអន្តរជាតិ​មក​ទស្សនា​​កម្សាន្ត​យ៉ាងច្រើន​គួរឲ្យកត់សម្គាល់។

លោក ហម អរុណ អនុប្រធានមន្ទីរទេសចរណ៍ខេត្តបាត់ដំបង​បាន​ប្រាប់កម្ពុជាថ្មីថា ក្រោយពីខាងមន្ទីរបានរៀបចំកែលម្អ​បន្ថែម ភ្ញៀវជាជនបរទេសមានមកទស្សនាកម្សាន្តជាបន្តបន្ទាប់ ក្នុងមួយថ្ងៃមានចន្លោះពី ៥០ ទៅ ៦០ នាក់ ហើយបើរដូវ​អត់​​មានភ្លៀងធ្លាក់​អាចនឹងមានភ្ញៀវបរទេសច្រើនជាងនេះ។

ភ្នំសំពៅជារមណីយដ្ឋានវប្បធម៌ប្រវត្តិសាស្ត្រមួយ ស្ថិតនៅតាមដងផ្លូវជាតិលេខ ៥៧ (អតីតផ្លូវជាតិលេខ១០) នៅ​ក្នុងឃុំភ្នំសំពៅ ស្រុកបាណន់ មានចំងាយ ១៣ គីឡូម៉ែត្រពីទីរួមខេត្តបាត់ដំបង។

លោក ហម អរុណ បានបន្ថែមថា ដោយសារ​អាកាសធាតុល្អប្រសើរឡើងវិញពោលគឺមិនសូវមានភ្លៀងធ្លាក់ជោគជាំ ទាំំងភ្ញៀវទេសចរជាតិនិងអន្តរជាតិ បានសម្រុកមកកម្សាន្តប្រមាណជាង ២០០ នាក់ក្នុងមួយថ្ងៃ។

ភ្នំសំពៅ​មានកម្ពស់ប្រមាណ ១០០ ម៉ែត្រ មានកាំជណ្តើរ​ឡើងចំនួន ១០៣០កាំ នៅលើកំពូលភ្នំ មានវត្តមួយឈ្មោះថា វត្តគិរីរម្យ និងមានល្អាងរូងភ្នំជាច្រើន សរុបទាំងអស់ចំនួន១២ រួមមាន៖ ១.ល្អាងផ្កាស្លា, ២.ល្អាងគក់ទ្រូង,៣.ល្អាងខ្យល់​,៤.ល្អាងតែងខ្លួន,៥.ល្អាងល្ខោន,៦.ល្អាងជ្រៃ,៧.ល្អាងពេជ្រ, ៨.ល្អាង ខ្វែង,៩.ល្អាងប្រេង,១០.ល្អាងស្ថានីយ ឬល្អាងធំ,១១.ល្អាងក្បាលខ្មោច,១២.ល្អាងប្រចៀវ។ ក្នុងចំំណោមល្អាងទាំង១២ គឺមានតែល្អាងផ្កាស្លា និងល្អាងល្ខោន ​ដែលភ្ញៀវចូល​ទស្សនាច្រើន។ ក្រៅពីនេះអ្វីដែលភ្ញៀវទេសចរទាំងជាតិនិងអន្តរជាតិពេញនិយមនោះ គឺទស្សនីយភាពហ្វូងសត្វប្រចៀវរាប់លានក្បាល ដែលហោះចេញពីល្អាងជារៀងរាល់ថ្ងៃ មុនពេលសុរិយារៀបអស្តង្គត នៅចន្លោះម៉ោង ៥ និង ៣០ នាទី ដល់ម៉ោង ៦ និង ៣០នាទីល្ងាច។

ខេត្តបាត់ដំបងមានគោលដៅទេសចរណ៍សរុបចំនួន ១១៥ ទីតាំង ខណៈ​នៅក្នុងក្រុងបាត់ដំបងមានកន្លែងកម្សាន្តចំនួន ៣៤ ទីតាំង ក្នុងនោះមានរមណីយដ្ឋានទេសចរណ៍ចំនួន ០១ ទីតាំង សហគមន៍ទេសចរណ៍និងអេកូទេសចរណ៍ចំនួន ០១ ទីតាំង តំបន់គោលដៅទេសចរណ៍ចំនួន ១៥ ទីតាំង សារ:មន្ទីរចំនួន ០២ ទីតាំង និងទេសចរណ៍សាសនាមានចំនួន ១៥ ទីតាំង៕

អត្ថបទ៖ សៅ សារិទ្ធ