គណៈបញ្ជាការឯកភាពខណ្ឌមានជ័យ ឃាត់ខ្លួនជនសង្ស័យ ០៣នាក់ រកឃើញសម្ភារសង្ស័យជាប់ពាក់ព័ន្ធ បទល្មើសឆបោកអនឡាញ

អាជ្ញាធរខណ្ឌមានជ័យ បើកប្រតិបត្តិការស្រាវជ្រាវ ឃាត់ខ្លួនជនសង្ស័យ ០៣នាក់ ក្រោយត្រួតពិនិត្យហាងទិញលក់គ្រឿង អេឡិកត្រូនិក រកឃើញសម្ភារៈជាច្រើនរយគ្រឿង សង្ស័យជាប់ពាក់ព័ន្ធ ត្រៀមប្រព្រឹត្តបទល្មើស «អនឡាញស្កេម» ។

ការចុះបង្រ្កាបនេះដែរធ្វើឡើងកាលពីយប់ថ្ងៃទី១៦ ខែមិថុនា​ ឆ្នាំ២០២៦នេះ នៅចំណុចផ្ទះលេខ២២៨ ផ្លូវCommercial ភូមិព្រែកតាគង់១ សង្កាត់ចាក់អង្រែលើ ខណ្ឌមានជ័យ រាជធានីភ្នំពេញ ក្រោមការបញ្ជាដោយផ្ទាល់ពីលោក សេង គន្ធ អភិបាលខណ្ឌមានជ័យ​ ដឹកនាំកម្លាំងគណៈបញ្ជាការឯកភាពខណ្ឌ សហការជាមួយការិយាល័យប្រឆាំងបទល្មើសបច្ចេកវិទ្យា នៃស្នងការដ្ឋាននគរបាលរាជធានីភ្នំពេញ បានបន្តចុះអនុវត្តអនុក្រឹត្យលេខ០៣របស់រដ្ឋាភិបាល ដើម្បីទប់ស្កាត់បទល្មើស Online Scams ក្នុងមូលដ្ឋាន។

ជាលទ្ធផល កម្លាំងជំនាញបានឃាត់ខ្លួនមនុស្ស៣នាក់ (បុរសជនជាតិចិន០១នាក់ ខ្មែរ០២នាក់) និងរកឃើញសម្ភារៈជាវត្ថុតាង សង្ស័យជាប់ពាក់ព័ន្ធ ត្រៀមប្រព្រឹត្តការឆបោកតាមប្រព័ន្ធបច្ចេកវិទ្យា (ONLINE SCAMS) ។ ក្នុងនោះរួមមាន ៖ ទូរស័ព្ទដៃចំនួន ៦៨២គ្រឿង , កុំព្យូទ័រ(All in one)ចំនួន ៦២គ្រឿង , Monitorចំនួន ២៦គ្រឿង , កុំព្យូទ័រយួរដៃ(Laptop)ចំនួន០៥គ្រឿង ,ធុងCPUចំនួន ០៩គ្រឿង។

បច្ចុប្បន្ន ជនជាប់ពាក់ព័ន្ធទាំងអស់ និងសម្ភារៈខាងលើ បានបញ្ជូនទៅស្នងការនគរបាលរាជធានីភ្នំពេញ ដើម្បីសួរនាំ និងចាត់វិធានការតាមនីតិវីធីផ្លូវច្បាប់ ៕ អត្ថបទ ៖ រដ្ឋា