លោក ស សុខា ផ្តល់ម៉ូតូមួយគ្រឿងដល់និស្សិតដែលបានបាត់ម៉ូតូនៅថ្ងៃទទួលសញ្ញាបត្ររបស់ខ្លួន

នៅព្រឹកថ្ងៃទី២២ ខែវិច្ឆិកា ឆ្នាំ២០២៤ លោក ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានជួបពិភាក្សាជាមួយនិស្សិត ហេង គឹមហុង ដែលបានបាត់ម៉ូតូនៅថ្ងៃទទួលសញ្ញាត្រ ព្រមទាំងបានឧត្ថម្ភម៉ូតូថ្មីជូនដល់និស្សិត ហេង គឹមហុង ជាមួយនឹងថវិកាមួយចំនួនទៀត។

ការផ្តល់ជូននេះ ធ្វើឡើងបន្ទាប់ពី និស្សិត ហេង គឹមហុង ត្រូវបានចោរលួចម៉ូតូ១គ្រឿង នៅថ្ងៃទី២១ ខែវិច្ឆិកា ឆ្នាំ២០២៤ ក្នុងឱកាសចូលរួមពិធីប្រគល់សញ្ញាបត្រថ្នាក់បរិញ្ញាបត្រ និងថ្នាក់បរិញ្ញាបត្រជាន់ខ្ពស់ ជូននិស្សិតសាកលវិទ្យាល័យភូមិន្ទភ្នំពេញ។ និស្សិត ហេង គឹមហុង បានបញ្ចប់ការសិក្សាជំនាញរូបវិទ្យា ថ្នាក់បរិញ្ញាបត្រ ឆ្នាំសិក្សា២០២១-២០២២។

នៅលើទំព័រហ្វេសប៊ុករបស់ លោក ស សុខា បានសរសេរថា៖ “ដើម្បីជួយសម្របសម្រួលដល់ការធ្វើដំណើររបស់ប្អូនប្រុស ខ្ញុំ និងក្រុមគ្រួសារ បានឧបត្ថម្ភម៉ូតូ ចំនួន ១គ្រឿង និងថវិកាមួយចំនួន ជូនដល់ប្អូនប្រុស និងក្រុមគ្រួសារផងដែរ”៕