តា ចេក រន្ធត់ចិត្តពេលឮដំណឹងកូនប្រសារត្រូវឡានបុកស្លាប់ ខណៈគ្រួសារសង្ឈឹមទទួលបានយុត្តិធម៌

តារាកំប្លែងលោក តា ចេក បានបង្ហាញអារម្មណ៍រន្ធត់ចិត្តជាខ្លាំង ក្រោយទទួលដំណឹងថាកូនប្រសារត្រូវរថយន្តបុកបណ្តាលឲ្យស្លាប់ នៅតាមបណ្តោយផ្លូវ ២០០៤ ខណ:តាចេក និងក្រុមគ្រួសារសង្ឈឹមទទួលបានយុត្តិធម៌ចំពោះករណីនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តារាកំប្លែងជើងចាស់មានឈ្មោះដើមឈុំ ប៊ុន ឈឿន ហៅតា ចេក បានរៀបរាប់ដោយក្តីតក់ស្លុតថា “ខ្ញុំអើយយកបន្លែមកដល់មិនទាន់បានលក់ផង គេតេមកប្រាប់ថាកូនប្រសារខ្ញុំ ឡានបុកស្លាប់ហើយ នៅផ្លូវ២០០៤ ពេលចេញពីធ្វើការ“។

លោកតា ចេក បានបញ្ជាល់ថា រថយន្តបង្កហេតុ(ឡាន) ចាប់បានទាំងអ្នកបើកបរបានហើយ នៅស្នងការនគបាលរាជធានីភ្នំពេញ ទួលគោក ខណៈកូនៗរបស់លោកបានទៅសុំជួបអ្នកបើកបរដែរ តែប៉ូលិសមិនឱ្យជួបទេ ដោយបានប្រាប់ ថា ឱ្យយកសពទៅធ្វើបុណ្យសិនទៅ រួចរាល់ចាំមកដោះស្រាយជាក្រោយ។

តារាកំប្លែងតា ចេក បានបន្ថែមទៀតថា “ខ្ញុំសង្ឃឹមថាច្បាប់នឹងរកយុត្តិធម៌ដល់ក្រុមគ្រួសារខ្ញុំ ដោយសច្ចៈយុត្តិធម៌មិនលំអៀង ទៅតាមច្បាប់ចរាចរណ៍ ក្នុងព្រះរាជាណាចក្រកម្ពុជា“។ តាមរយ:ដំណឹងនេះ ក៏មានអ្នកគាំទ្រនិងមហាជនបានចូលរួមរំលែកមរណ:ទុក្ខដ៏ក្រៀមក្រំនេះជាមួយតារាកំប្លែងតាចេក និងក្រុមគ្រួសារផងដែរ៕ អត្ថបទ៖​ចាន់រ៉ា