ព័ត៌មានអន្ដរជាតិ

អ្នកជំនាញថៃ ព្រមានពីហានិភ័យសេដ្ឋកិច្ច ដោយសារសង្រ្គាមពាណិជ្ជកម្ម

បានផុស

៦ ខែ មុន

នៅ

ថ្ងៃចន្ទ ១៦ ធ្នូ ២០២៤

ដោយ

អ្នកជំនាញផ្នែកសេដ្ឋកិច្ច បានព្រមានរដ្ឋាភិបាលដឹកនាំដោយគណបក្សភឿថៃ ឱ្យបង្កើនវិធានការសេដ្ឋកិច្ចសកម្ម ដោយថាប្រទេសថៃទំនងជារងគ្រោះដោយវិបត្តិសេដ្ឋកិច្ច ដែលបណ្ដាលមកពីកំណើននៃភាពតានតឹងនៃសង្គ្រាមពាណិជ្ជកម្ម។ នេះបើតាមការចុះផ្សាយរបស់កាសែត The Nation។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងបទសម្ភាសន៍មួយចេញផ្សាយលើ YouTube កាលពីពេលថ្មីនេះ អ្នកជំនាញ អ្នកស្រី Sirikanya Tansakun ដែលជាសមាជិកសភានៃគណបក្សប្រជាជន (ដែលបង្កើតឡើងក្រោយគណបក្សចលនាឆ្ពោះទៅមុខ ត្រូវបានរំលាយ) បាននិយាយថា សេដ្ឋកិច្ចរបស់ប្រទេសរំពឹងថានឹងកាន់តែអាក្រក់ទៅៗ ដោយសារតែកត្តាមិនច្បាស់លាស់មួយចំនួន ខណៈវិធានការជំរុញកំណើនសេដ្ឋកិច្ចផ្សេងៗនៅឆ្នាំនេះ នឹងមិនជួយសេដ្ឋកិច្ចឱ្យបានច្រើន នៅឆ្នាំក្រោយនោះទេ។

ដូច្នេះ អ្នកស្រី Sirikanya បានបន្តថា៖ «ដូច្នេះវា នឹងក្លាយជាបញ្ហាធំសម្រាប់រដ្ឋាភិបាលក្នុងការរក្សាកំណើន ស្របតាមសក្តានុពលរបស់ប្រទេស ឬក្នុងការបង្កើនសក្តានុពលដើម្បីពង្រីកកំណើនសេដ្ឋកិច្ច»។ អ្នកស្រីបានព្រួយបារម្ភពីការណ៍ដែលថា រដ្ឋាភិបាលថៃប្រើតែវិធានការការពារដោយគ្មានវិធានការសកម្មសម្រាប់ស្ថានភាពសេដ្ឋកិច្ចរយៈពេលខ្លី និងរយៈពេលវែង។

អាក្រក់ជាងនេះទៅទៀត អ្នកស្រី Sirikanya បាននិយាយថា វាត្រូវការពេលយូរជាងការរំពឹងទុកសម្រាប់រដ្ឋាភិបាលក្នុងការអនុវត្តគោលនយោបាយមុនការបោះឆ្នោតរបស់ខ្លួន ដូចជាគម្រោងកាបូបឌីជីថល ការរៀបចំរចនាសម្ព័ន្ធបំណុលគ្រួសារ និងការអភិវឌ្ឍជំនាញការងារជាដើម។

អ្នកជំនាញដដែល បានលើកឡើងថា វិបត្តិសេដ្ឋកិច្ចនឹងកាន់តែអាក្រក់ទៅៗ ភាគច្រើនដោយសារតែសង្គ្រាមពាណិជ្ជកម្មកាន់តែខ្លាំងឡើង ក្រោយប្រធានាធិបតីជាប់ឆ្នោតអាមេរិក លោក ដូណាល់ ត្រាំ ចូលកាន់តំណែងនៅដើមឆ្នាំក្រោយ។ ហើយបើទោះបីជាក្នុងសេណារីយ៉ូដែលថា លោក ត្រាំ មិនដំឡើងពន្ធលើការនាំចូលឱ្យចាស់ដៃដូចការគំរាមរបស់លោក នាពេលកន្លងមកក៏ដោយ ការវានៅតែមានហានិភ័យសម្រាប់សេដ្ឋកិច្ចថៃក្នុងកម្រិតខ្លះ។

លើសពីនេះ ខណៈសង្គ្រាមពាណិជ្ជកម្មរវាងសហរដ្ឋអាមេរិក និងចិន អាចជំរុញឱ្យក្រុមហ៊ុនចិនផ្លាស់ប្តូរមូលដ្ឋានរបស់ខ្លួនមកថៃក៏ដោយ ក៏រដ្ឋាភិបាលសហរដ្ឋអាមេរិកអាចនឹងនៅតែកំណត់គោលដៅក្រុមហ៊ុនចិនក្នុងប្រទេសថៃ ឧទាហរណ៍ដូចជាក្រុមហ៊ុនផលិតបន្ទះស្រូបថាមពលពន្លឺព្រះអាទិត្យជាដើម។

ជាមួយគ្នានោះ អ្នកស្រី Sirikanya បានព្យាករផងដែរថា វិស័យទេសចរណ៍ដែលអាចនឹងយឺតយ៉ាវ និងការប្រើប្រាស់ឯកជនដែលឆ្លុះបញ្ជាំងពីលក្ខខណ្ឌនៃតម្រូវការនោះ នឹងមិនជួញជំរុញសេដ្ឋកិច្ចខ្លាំងក្លានៅឆ្នាំក្រោយនោះទេ ចំពេលសេដ្ឋកិច្ចឆ្នាំនេះបន្តដើរអូសជើងរួចទៅហើយ។

ខណៈជំរុញឱ្យរដ្ឋាភិបាលធ្វើកំណែទម្រង់ពន្ធ ដើម្បីបង្កើនការយកពន្ធ អ្នកស្រីក៏បានលើកឡើងផងដែរ ឱ្យរដ្ឋាភិបាលចរចាជាមួយរដ្ឋបាលលោក ត្រាំ ឱ្យលើកលែងការដាក់ពន្ធលើទំនិញនាំចូលអាមេរិកពីប្រទេសថៃ។