ករណីបង្ក្រាបទល្មើស! សមត្ថកិច្ចស្នើមហាជនមើលព្រៃទាំងមូល កុំមើលដើមឈើមួយដើម

អ្នកនាំពាក្យស្នងការនគរបាលរាជធានីភ្នំពេញ លោក សំ វិច្ឆិកា បានឱ្យដឹងថា ក្នុងរយៈពេល ៣ខែចុងក្រោយនាឆ្នាំ ២០២៥នេះ សមត្ថកិច្ចបានធ្វើការស្រាវជ្រាវបង្ក្រាបករណីបទល្មើសព្រហ្មទណ្ឌ និងបទល្មើសនានាច្រើនករណី គួរឱ្យកត់សម្គាល់ និងស្នើមហាជនឱ្យមើលព្រៃទាំងមូល។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នាសន្និសីទ បង្ហាញមុខក្រុមជនសង្ស័យចំនួន២៣នាក់ពាក់ព័ន្ធ បន្លំឯកសណ្ឋានសមត្ថកិច្ច និងក្រុមឆក់ នារសៀលថ្ងៃទី ១១​ខែមេសានេះ លោក សំ វិច្ឆិកា មានប្រសាសន៍ថា ក្នុងរយៈពេល ៣ខែ​បទល្មើសព្រហ្មទណ្ឌ កើតឡើងចំនួន ១២២ លើក បទល្មើសថយចុះ ១៨លើក ក្នុងចំណោម ១២២លើក បង្ក្រាបបាន ១១៦ ករណី ឃាត់ខ្លួនមនុស្ស ១៧១​ នាក់ ស្មើ ៩៥ ភាគរយដែលបង្ក្រាបបាន។ ក្នុងនោះបទឧក្រិដ្ឋ និងបទល្មើសមជ្ឈឹមក៏មានការថយចុះ ពោលបទឧក្រិដ្ឋកើតឡើង ១២០ លើក បង្ក្រាបបាន ១៩ លើក ឃាត់មនុស្ស ៥០នាក់ ។ ដោយឡែកបទល្មើសមជ្ឈឹម ១០២ លើក បង្ក្រាបបាន ៩៧ លើក ឃាត់មនុស្ស១២១​នាក់។

លោកបញ្ជាក់ថា៖« ​អ៊ីចឹង! ជាលទ្ធផល ៣ខែចុងក្រោយនេះ ឆ្នាំ ២០២៥ ដែលជាលទ្ធផលផ្លែផ្កា ដោយកិច្ចខិតប្រឹងប្រែងរបស់សមត្ថកិច្ចរាជធានីភ្នំពេញ គ្រប់បណ្តាលប៉ុស្តិ៍ ខណ្ឌ នានា យើងបានសហការគ្នាទទួលបានលទ្ធផលបែបនេះ»។ ជាមួយគ្នានេះលោក សំ វិច្ឆិកា ស្នើថា៖«នេះជាអ្វីដែលជាកិច្ចខិតខំប្រឹងប្រែងរបស់សមត្ថកិច្ច ដូច្នេះយើងធ្វើសូមឱ្យមហាជនមើលព្រៃទាំងមូល កុំមើលដើមឈើមួយដើម។ មានន័យថាបទល្មើសខ្លះយើងបង្ក្រាបមិនទាន់បាន យើងបន្តស្រាវជ្រាវបង្ក្រាប»៕