តម្លៃប្រេង​កើនបន្តិចពេលបញ្ចប់ការជួញដូរ ជុំំវិញកង្វល់ការចរចានុយក្លេអ៊ែរអ៊ីរ៉ង់

តម្លៃប្រេងអន្តរជាតិ បានកើនឡើងបន្តិចពេលបញ្ចប់ការជួញដូរកាលពីថ្ងៃសុក្រ ​នៅពេលដែលតម្រូវការប្រេងក្នុងស្រុកអាមេរិកកើនឡើងមុនថ្ងៃបុណ្យជាតិចុងសប្ដាហ៍ រួមជាមួយដោយក្ដីបារម្ភអំពីការជាប់គាំងជាថ្មីនៃកិច្ចចរចានុយក្លេអ៊ែរចុងក្រោយរវាងសហរដ្ឋអាមេរិក និងអ៊ីរ៉ង់។

តាមការចុះផ្សាយរបស់ទីភ្នាក់ងារសារព័ត៌មាន​រ៉យទ័រ តម្លៃប្រេងឆៅនាពេលអនាគត ម៉ាក Brent បានកើនឡើង ៣៤ សេន ឬ ០,៥៤ ភាគរយ ដោយបញ្ចប់ការជួញដូរនៅតម្លៃ ៦៤,៧៨ ដុល្លារ/បារ៉ែល ខណៈប្រេងឆៅអាមេរិក ម៉ាក West Texas Intermediate (WTI) វិញ បានបិទបញ្ចប់នៅតម្លៃ ៦១,៥៣ ដុល្លារ ដោយកើនឡើង ៣៣ សេន ឬ ០,៥៤ ភាគរយ។

ទិវារំឭកការចងចាំនៅថ្ងៃចន្ទ និងចុងសប្ដាហ៍នេះ គឺជាការចាប់ផ្ដើមនៃការធ្វើដំណើររដូវក្ដៅរបស់ប្រជាជនអាមេរិក​ ដែលជាធម្មតា ធ្វើឱ្យតម្រូវការប្រេងកើនឡើង។ កំណើនតម្លៃ ក៏បណ្ដាលមកពីកង្វល់ជុំវិញភាពមិនរលូននៃការចរចាស្ដារឡើងវិញនៃកិច្ចព្រមព្រៀងនុយក្លេអ៊ែរអ៊ីរ៉ង់ផងដែរ ដែលបន្តរាំងស្ទះដល់លំហូរប្រេងអ៊ីរ៉ង់ចូលទីផ្សារអន្តរជាតិ ដោយសារតែទណ្ឌកម្មសេដ្ឋកិច្ចរបស់សហរដ្ឋអាមេរិក។

យ៉ាងណាមិញ កំណើនតម្លៃនៅមានកម្រិត ដោយកត្តាធំៗពីយ៉ាង។ កាលពីថ្ងៃសុក្រ លោក ត្រាំ បាន​គំរាមដំឡើងពន្ធ ៥០ ភាគរយ លើអឺរ៉ុបចាប់ពីថ្ងៃទី ១ មិថុនា ដោយនិយាយថា ប្លុកនេះពិបាកចរចាគ្នា។ ជាមួយគ្នានោះ ក៏មាន​ការព្រួយបារម្ភផងដែរ ជុំវិញការបង្កើនផលិតកម្មប្រេងរបស់អង្គការនៃប្រទេសនាំចេញប្រេងកាត ដែលធ្វើឱ្យការផ្គត់ផ្គង់កាន់តែច្រើន៕