ព័ត៌មានអន្ដរជាតិ

ថៃចេញការព្រមានពីទឹកជំនន់ភ្លាមៗនៅខេត្តភាគខាងជើងនិងខាងត្បូង

បានផុស

៣៧ វិនាទី មុន

នៅ

ថ្ងៃចន្ទ ២៦ ឧសភា ២០២៥

ដោយ

យោងតាមការចេញផ្សាយរបស់កាសែត Bangkok Post នៅថ្ងៃទី២៦ខែឧសភានេះ នាយកដ្ឋានបង្ការ និងកាត់បន្ថយគ្រោះមហន្តរាយថៃ បានប្រកាសព្រមានអំពីទឹកជំនន់ភ្លាមៗដែលអាចកើតមាននៅក្នុងខេត្តភាគខាងជើងនិងខេត្តភាគខាងត្បូងរបស់ប្រទេសនេះក្នុងអំឡុងពេលប៉ុន្មានថ្ងៃនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ខេត្តដែលទទួលរងគ្រោះទឹកជំនន់នៅភាគខាងជើងទាំងនោះរួមមានខេត្ត Chiang Mai, Chiang Rai, Mae Hong Son និងខេត្ត Tak និងនៅខេត្តភាគខាងត្បូងនៃប្រទេស រួមមាន ខេត្ត Krabi, Phang Nga និងខេត្ត Phuket។

លើសពីនេះក្រសួងធនធានទឹក និងឧតុនិយមថៃ បានចេញសេចក្តីជូនដំណឹង ស្តីពីស្ថានភាពអាកាសធាតុ ចាប់ពីថ្ងៃទី២៥ ដល់ថ្ងៃទី២៧ ខែឧសភា ដោយប្រាប់ប្រជាពលរដ្ឋទូទាំងប្រទេស ឱ្យត្រៀមលក្ខណៈសម្រាប់ភ្លៀងធ្លាក់ខ្លាំង ទឹកជំនន់ និងជំនន់ទឹកភ្លៀង។

អាជ្ញាធរថៃណែនាំឲ្យប្រជាពលរដ្ឋចៀសវាងការធ្វើដំណើរឆ្លងកាត់តំបន់ដែលជួបព្យុះផ្គរ រន្ទះ ឬតំបន់ទឹកជំនន់ ប្រុងប្រយ័ត្នពេលបើកបរ និងប្រុងប្រយ័ត្នតំបន់ងាយនឹងបាក់ដី ជាពិសេសក្បែរភ្នំ និងមាត់ទន្លេ។ ចំពោះកសិករត្រូវត្រៀមបង្ការដើម្បីកុំឲ្យខូចខាតដំណាំ បន្លែ បង្ការជាដើម។

ទោះបីស្ថានភាពត្រូវបានរំពឹងថានឹងមានភាពប្រសើរឡើងចាប់ពីថ្ងៃទី ២៨ ដល់ថ្ងៃទី៣១ ខែឧសភាក៏ដោយ ប៉ុន្តែការគំរាមកំហែងពីទឹកជំនន់នៅតែបន្តកើតមាននៅតំបន់ដែលបន្តទទួលភ្លៀងធ្លាក់ខ្លាំង ជាពិសេសនៅភាគខាងជើង និងឦសាន៕