ព័ត៌មានអន្ដរជាតិ

ថៃ ទទួលស្គាល់ថា ទាហានដែលខ្លួនសង្ស័យជាជនជាតិរុស្ស៊ី គឺពិតជាកីឡាករបាល់ទះកម្ពុជាមែន តែនឹងស៊ើបបន្ត

បានផុស

១០ ខែ មុន

នៅ

ថ្ងៃព្រហស្បតិ៍ ៣១ កក្កដា ២០២៥

ដោយ

ក្រោយចោទប្រកាន់យ៉ាងហួសចិត្តថា ទាហានស៊ីឈ្នួលរុស្ស៊ីមកជួយប្រយុទ្ធកម្ពុជាក្នុងជម្លោះព្រំដែននោះ អនុរដ្ឋមន្ត្រីក្រសួងការពារជាតិថៃ Nattaphon Narkphanit ចេញមុខបញ្ជាក់ថា ខ្លួនគ្មានព័ស្តុតាទេ ប៉ុន្តែនឹងបើកការស៊ើបអង្កេតជាបន្ត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងក្នុងសន្និសីទកាសែតកាលពីថ្ងៃពុធទី៣០ខែកក្កដាឆ្នាំ២០២៥ លោក Nattaphon បានលើកឡើងពីលទ្ធផលនៃការស៊ើបអង្កេតបឋម ដែលបញ្ជាក់ថា រូបភាពទាហានកម្ពុជាដែលគេចែកចាយលើបណ្តាញសង្គមគឺជាកីឡាករបាល់ទះមែន ប៉ុន្តែមានការភាន់ច្រឡំថាជាជនបរទេសដោយសារមុខមាត់ស្រដៀងសាសន៍ដទៃ។

ដើម្បីឲ្យអស់ចម្ងល់ កម្ពុជាបានបកស្រាយយ៉ាងច្បាស់ឲ្យថៃឈប់ល្ងង់ថា ទាហានដែលថៃសង្ស័យនោះ គឺជាកីឡាករបាល់ទះកម្ពុជាឈ្មោះ ឈាង ជីវែង។ រូបគេស្ថិតក្នុងអង្គរក្ស ២ នាក់ ដែលមានកាយសម្បទាខ្ពស់ ធំ និងសម្បុរស ធ្វើឲ្យអ្នកប្រើប្រាស់បណ្តាញទំនាក់ទំនងថៃចាប់អារម្មណ៍ និងចោទថាជាទាហានរុស្ស៊ីមកជួយកម្ពុជាទៅវិញ។

កីឡាករ ឈាង ជីវែង ដែលធ្លាប់ជាប់ជម្រើសជាតិកម្ពុជា បានឈ្នះជើងឯកលីគបាល់ទះកំពូលកម្ពុជា «តេជោលីគ» ពីរលើកជាប់គ្នាជាមួយក្រុមបាល់ទះបញ្ជាការដ្ឋានអង្គរក្ស នៅឆ្នាំ ២០២៤ និង ២០២៥។ កីឡាករមានការងារជាអង្គរក្សនៅបញ្ជាការដ្ឋានអង្គរក្សដែលទៅណា មកណាដែលតែងតែទៅជាមួយ លោក នាយឧត្តមសេនីយ៍ កិតិ្តសង្គហបណ្ឌិត ហ៊ីង ប៊ុនហៀង អគ្គមេបញ្ជាការរង និងជាមេបញ្ជាការដ្ឋានអង្គរក្ស។

កាលពីដើម ឆ្នាំ២០២៤ កីឡាករ ឈាង ជីវែង បានរបួសក្រឡាច់ក-ជើងស្ដាំដ៏រន្ធត់មួយនៅអំឡុងពេលរូបគេកំពុងបង្ហាញសមត្ថភាពយ៉ាងល្អក្នុងជំនួបក្លឹបបញ្ជាការដ្ឋានអង្គរក្ស ជាមួយក្លឹបបាល់ទះក្រសួងមហាផ្ទៃ ដណ្ដើមពានរង្វាន់តេជោលីគឆ្នាំ២០២៤។ របួសនោះបានធ្វើឲ្យរូបគេឃ្លាតឆ្ងាយពីទីលានបាល់ទះ និងព្យាបាលច្រើនខែ ប៉ុន្តែឈានចូលតេជោលីគ ឆ្នាំ ២០២៥ រូបគេបានជាសះស្បើយ និងអាចលេងកម្រិតអាជីពវិញ៕

អត្ថបទ៖ សុខ សុវណ្ណ

ចុចអាន៖ បណ្តាញទំនាក់ទំនងសង្គមថៃ ចោទ កីឡាករបាល់ទះ ឈាង ជីវែង ជាទាហានរុស្ស៊ី