ទំនាយថ្ងៃចូលឆ្នាំខាលនេះទាំងបីថ្ងៃ មានហេតុភេទមិនធម្មតា

មហាសង្ក្រាន្ត ឆ្នាំខាល ចត្វាស័ក ពុទ្ធសករាជ ២៥៦៦ គ្រិស្តសករាជ ២០២២នេះ នឹងចូលនៅថ្ងៃព្រហស្បតិ៍ ១៣កើត ខែចេត្រ ត្រូវនឹងថ្ងៃទី១៤ ខែមេសា គ្រិស្ដសករាជ ២០២២ វេលាម៉ោង ១០:០០នាទី។

លោក អ៊ឹម បុរិន្ទ នាយក នៃគណៈកម្មការស្រាវជ្រាវវិជ្ជាហោរាសាស្ត្រ និងប្រពៃណីទំនៀមទម្លាប់ខ្មែរ បានឱ្យ “កម្ពុជាថ្មី” ដឹងថា ទំនាយថ្ងៃមហាសង្ក្រាន្ត ថ្ងៃចូលឆ្នាំ ត្រូវនឹងថ្ងៃព្រហស្បតិ៍ ទំនាយថា ឆ្នាំនោះព្រះរាជា ព្រះសង្ឃ រាជគណៈព្រឹទ្ធាចារ្យចាស់ស្រុកនឹងមានសេចក្ដីក្ដៅក្រហាយខ្លោចផ្សាចិត្តច្រើនជាអនេក។

នាយក នៃគណៈកម្មការស្រាវជ្រាវវិជ្ជាហោរាសាស្ត្រ និងប្រពៃណីទំនៀមទម្លាប់ខ្មែរ រូបនេះ បានឱ្យដឹងជាបន្តថា ទំនាយថ្ងៃវ័នបត ត្រូវនឹងថ្ងៃ សុក្រទំនាយថា ឆ្នាំនោះម្ទេសនឹងមានតម្លៃ សត្វត្មាត ក្អែក ស្លាប់ដោយជំងឺអាសន្នរោគ សត្វព្រៃទាំងឡាយនឹងវិនាសអន្តរាយទៅដោយ ប្រការផ្សេងៗ តែ ឯស្ត្រីមេម៉ាយនឹងមានលាភ។

លោក អ៊ឹម បុរិន្ទ លើកឡើងបន្តថា ទំនាយថ្ងៃឡើងស័ក ថ្ងៃឡើងស័កត្រូវនឹងថ្ងៃសៅរ៍ ទំនាយថា ឆ្នាំនោះពពួកទាហានក្លាហានទាំងឡាយប្រកបដោយសេចក្តីសុខនឹងមានវិជ្ជាការផ្សេងៗ ទោះបីធ្វើយុទ្ធសង្គ្រាមនឹងបច្ចាមិត្តគ្រប់ទិសទី នឹងមានជ័យជំនះគ្រប់ពេលវេលា។ ទឹកភ្លៀងទឹកទន្លរធំ តែមាន កើតចោរឃ្មួយ ចោរលួច ចោរប្លន់ច្រើន។

អ្នកស្រាវជ្រាវវិជ្ជាហោរាសាស្ត្រខ្មែរ ចិន សាកល រូបនេះ ឱ្យដឹងបន្ថែមថា ពេលវេលាមហាសង្ក្រាន្ត ចូលឆ្នាំនៅវេលាម៉ោង ១០ ព្រឹក នោះព្រះនាងទេធីតាឈរ នៅលើពាហណៈ ទំនាយថា បរិជន ឬជននៅជិតខាងទាំងឡាយ នឹងមានសេចក្តីវិបត្តិប្រែត្រឡប់ទៅជាប្រការដទៃផ្សេងនានាជាអនេក។ ខុនណាង ឬភរិយាមន្ត្រីទាំងឡាយនឹងក្ដៅក្រហាយចិត្តជាអនេកកប្បការ។

លោក អ៊ឹម បុរិន្ទ បញ្ជាក់ថា នៅក្នុងឱកាសសង្ក្រាន្តទាំងបីថ្ងៃ សូមអស់ប្រជាពលរដ្ឋប្រុសស្រីផងទាំងឡាយ រៀបចំពលិការ គ្រឿងសក្ការបូជា អុចប្រទីបជ្វាលា ថ្វាយព្រះរតនត្រ័យ និងទទួលស្វាគមន៍ ទេវបុត្រ ទេវធីតាឆ្នាំថ្មី ហើយខំលះបង់ចិត្តអាក្រក់អន្យតិ​រ្ថិយជាចិត្តអប្រិយជាប់ដោយគំនុំគុំកួនព្យាបាទ ឈ្នានីស ដែលកើតមានក្នុងឆ្នាំចាស់ឱ្យជ្រះស្រឡះ តាំងចិត្តប្រព្រឹត្តល្អប្រកបដោយ មេត្តា ករុណា មុទិតា ឧបេក្ខា និង បញ្ញា ធ្វើបុណ្យសុន្ទរ៍ទាន ឬទានល្អតាមប្រពៃណី រក្សាសីលប្រាំឱ្យបានជាប់ជានិច្ច នោះទេវតានឹងឱ្យពរសព្ទសាធុការ លោកអ្នកនឹងមានសិរីសួស្តី សុភមង្គល វិបុលសុខគ្រប់ប្រការតាំងពីឆ្នាំថ្មីនេះតរៀងទៅ៕

អត្ថបទ៖ ច័ន្ទ ​​វីរៈ