សន្តិសុខសង្គម

រយៈពេល១០ថ្ងៃ កម្ពុជាបណ្ដេញជនបរទេសខុសច្បាប់ ១,៣៦២នាក់ ចេញពីប្រទេស

បានផុស

១៣ វិនាទី មុន

នៅ

ថ្ងៃអាទិត្យ ១២ កក្កដា ២០២៦

ដោយ

ក្នុងរយៈពេល១០ថ្ងៃ ចាប់ពីថ្ងៃទី១ ដល់ថ្ងៃទី១០ ខែកក្កដា ឆ្នាំ២០២៦ អគ្គនាយកដ្ឋានអន្តោប្រវេសន៍ បានបណ្ដេញជនបរទេសសរុប ១,៣៦២នាក់ ក្នុងនោះស្រី ២៤៣នាក់ មាន ២៤សញ្ជាតិ ចេញពីព្រះរាជាណាចក្រកម្ពុជា ពាក់ព័ន្ធនឹងការស្នាក់នៅខុសច្បាប់ និងបទល្មើសផ្សេងៗ។

ប្រតិបត្តិការនេះ ធ្វើឡើងតាមអនុសាសន៍ដ៏ខ្ពង់ខ្ពស់របស់លោកអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងការណែនាំរបស់លោកឧត្តមសេនីយ៍ឯក សុខ វាសនា អគ្គនាយកអន្តោប្រវេសន៍ ដោយនាយកដ្ឋានស៊ើបអង្កេត និងអនុវត្តនីតិវិធី បានបន្តអនុវត្តវិធានការបណ្ដេញចេញជនបរទេសដែលល្មើសច្បាប់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជនបរទេសទាំងនោះមាន ២៤សញ្ជាតិ រួមមាន ឥណ្ឌូនេស៊ី ចិន បង់ក្លាដេស ថៃ វៀតណាម មីយ៉ាន់ម៉ា នីហ្សេរីយ៉ា ចិនតៃវ៉ាន់ កូរ៉េ ស្រីលង្កា ហ្វីលីពីន ឥណ្ឌា កាមេរូន យូហ្គង់ដា ទុយណេស៊ី ទួកមេនីស្ថាន ប៉ាគីស្ថាន រុស្ស៊ី បារាំង លីបេរីយ៉ា ស៊ុយអែត ហ្គាណា ហ្សកហ្ស៊ី និងចក្រភពអង់គ្លេស។

ក្នុងចំណោមនោះ ជនជាតិចិន ១៧០នាក់ (ស្រី៨នាក់) ត្រូវបានបណ្ដេញចេញតាមជើងហោះហើរពិសេសពីអាកាសយានដ្ឋានអន្តរជាតិតេជោ។ ជនជាតិវៀតណាម ៤៥នាក់ (ស្រី៣នាក់) ត្រូវបានបញ្ជូនចេញតាមច្រកទ្វារព្រំដែនអន្តរជាតិព្រៃវល្លិ៍ ខេត្តស្វាយរៀង ខណៈជនជាតិថៃ ៧៩នាក់ (ស្រី៣៥នាក់) ត្រូវបានបណ្ដេញចេញតាមច្រកទ្វារព្រំដែនអន្តរជាតិប៉ោយប៉ែត ខេត្តបន្ទាយមានជ័យ។

សម្រាប់ជនបរទេសផ្សេងទៀត ត្រូវបានបណ្ដេញចេញពាក់ព័ន្ធនឹងករណីលួចឆ្លងដែន ប្រើប្រាស់ឯកសារ និងទិដ្ឋាការក្លែងក្លាយ ស្នាក់នៅដោយគ្មានលិខិតឆ្លងដែន ចាប់ជំរិតទារប្រាក់ ឆបោកតាមប្រព័ន្ធអនឡាញ ជួញដូរ និងប្រើប្រាស់គ្រឿងញៀនខុសច្បាប់ ធ្វើការងារដោយខុសច្បាប់ ព្រមទាំងបទល្មើសព្រហ្មទណ្ឌផ្សេងៗ។

អគ្គនាយកដ្ឋានអន្តោប្រវេសន៍បានបញ្ជាក់ថា ការបណ្ដេញចេញជនបរទេសទាំងនេះ គឺជាការអនុវត្តវិធានការច្បាប់យ៉ាងម៉ឺងម៉ាត់របស់រាជរដ្ឋាភិបាល ក្នុងការបង្ក្រាប និងលុបបំបាត់ឧក្រិដ្ឋកម្ម ជាពិសេសបទល្មើសឆបោកតាមប្រព័ន្ធបច្ចេកវិទ្យា ដើម្បីធានាសន្តិសុខ សុវត្ថិភាពសាធារណៈ និងជួយសង្គ្រោះជនរងគ្រោះដែលត្រូវបានបោកបញ្ឆោតឱ្យចូលរួមក្នុងសកម្មភាពខុសច្បាប់ ឱ្យអាចវិលត្រឡប់ទៅប្រទេសកំណើតវិញដោយសុវត្ថិភាព៕