ក្រសួងវប្បធម៌ ពិភាក្សា កិច្ចសហប្រតិបត្តិការ គាំទ្រកម្មសិទ្ធិបញ្ញាផ្នែក សិទ្ធិអ្នកនិពន្ធនៅកម្ពុជា

នៅថ្ងៃសុក្រ ថ្ងៃទី២០ ខែតុលា ឆ្នាំ២០២៣ បណ្ឌិតសភាចារ្យ រដ្ឋមន្រ្តីក្រសួងវប្បធម៌ និងវិចិត្រសិល្បៈ បានអនុញ្ញាតឱ្យ ប្រធានសមាគមកម្មសិទ្ធិបញ្ញាកម្ពុជា (IPAC) បានចូលជួបសម្ដែងការគួរសម និងពិភាក្សាអំពីកិច្ចសហប្រតិបត្តិការក្នុងការគាំទ្រកម្មសិទ្ធិបញ្ញាផ្នែក សិទ្ធិអ្នកនិពន្ធនៅកម្ពុជា។ កិច្ចពិភាក្សានេះផ្តោតលើកិច្ចការងារសំខាន់ៗដូចជា៖

១. ការចុះអនុស្សារណ:យោគយល់គ្នា រវាងក្រសួង និង សមាគម

២. ការរៀបចំវគ្គបណ្តុះបណ្តាល និងសិក្ខាសាលានានាស្តីពី

– អនុសញ្ញាទីក្រុងប៊ែន ស្តីពីកិច្ចការពារស្នាដៃអក្សរសាស្ត្រនិងសិល្បៈ Berne Convention

– អង្គភាពគ្រប់គ្រងសិទិ្ធរួមCMOs

៣. កិច្ចសហប្រតិបត្តិការទូទៅរវាងក្រសួង និងសមាគម ក្នុងការអភិវឌ្ឍវិស័យកម្មសិទ្ធិបញ្ញានៅកម្ពុជា

៤. ជួយអភិវឌ្ឍទៅលើផ្នែក CMOs ឱ្យមានដំណើរការល្អ

៥. ជួយពង្រឹង និងជួយសម្របសម្រួលផ្នែកច្បាប់នូវ សេចក្ដីព្រាង និងលិខិតបទដ្ឋានគតិយុត្តនានា ទាំងច្បាប់បេតិកភណ្ឌវប្បធម៌ និងច្បាប់សិទិ្ធអ្នកនិពន្ធ និងសិទិ្ធប្រហាក់ប្រហែល

ឆ្លើយតបនឹងសំណើរបស់សមាគមខាងលើ បណ្ឌិតសភាចារ្យរដ្ឋមន្រ្តី បានឯកភាព និងគាំទ្រទាំងស្រុង ព្រមទាំងអនុញ្ញាតឱ្យមន្ត្រីជំនាញបន្តសហការអនុវត្តកិច្ចការទាំងអស់នេះ។

ជាកិច្ចបញ្ចប់ នៃជំនួបពិភាក្សា បណ្ឌិតសភាចារ្យ រដ្ឋមន្រ្តីក្រសួងវប្បធម៌ និងវិចិត្រសិល្បៈ បានជូនពរក្នុងការសម្រេចជោគជ័យលើការចូលរួមអភិវឌ្ឍកិច្ចការប្រទេសជាតិ ក្រោមការដឹកនាំរបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា ជានិរន្តន៍៕

អត្ថបទដោយ៖ នាយកដ្ឋានសិទិ្ធអ្នកនិពន្ធនិងសិទិ្ធប្រហាក់ប្រហែល