ព័ត៌មានអន្ដរជាតិ

ឥណ្ឌូណេស៊ីគ្រោងបោះទុន ៣ ប៊ីលានដុល្លារ បង្កើតរោងចក្រផលិតជីកសិកម្មចំនួន៧

បានផុស

៨ ខែ មុន

នៅ

ថ្ងៃសុក្រ ២៤ តុលា ២០២៥

ដោយ

រដ្ឋាភិបាលឥណ្ឌូណេស៊ីគ្រោងបោះទុនវិនិយោគជាទឹកប្រាក់ប្រមាណ ៣ ប៊ីលានដុល្លារ ដើម្បីសាងសង់រោងចក្រផលិតជីទំនើបថ្មីចំនួន ៧ កន្លែង ក្នុងបំណងពង្រឹងការផ្គត់ផ្គង់ជីក្នុងស្រុក ក្រោមគោលដៅបញ្ចប់ការសាងសង់ ៥ កន្លែង ត្រឹមឆ្នាំ ២០២៩។ នេះបើតាមការចុះផ្សាយរបស់ភ្នាក់ងារព័ត៌មានរដ្ឋ Antara។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

រដ្ឋមន្ត្រីក្រសួងកសិកម្មឥណ្ឌូណេស៊ី លោក Andi Amran Sulaiman បានថ្លែងក្នុងសន្និសីទសារព័ត៌មានមួយកាលពីថ្ងៃពុធ៖ «ថវិកាអភិវឌ្ឍន៍មានប្រមាណ ៥០ ទ្រីលានរូពី (៣ ប៊ីលានដុល្លារអាមេរិក)»។

លោកបានកត់សម្គាល់ថា រោងចក្រថ្មីៗនឹងដំណើរការទៅដោយប្រសិទ្ធភាពថាមពល ដែលជួយកាត់បន្ថយថ្លៃដើមផលិតកម្ម។ រោងចក្រចាស់ៗចំណាយលើឧស្ម័នរហូតដល់ ៤៣% នៃថ្លៃដើមប្រតិបត្តិការ ខណៈរោងចក្រថ្មីៗរំពឹងថានឹងចំណាយត្រឹមតែប្រហែល ២២-២៣% ប៉ុណ្ណោះ។

លោក Sulaiman បានបន្ថែមទៀតថា ការបង្កើតរោងចក្រផលិតជីថ្មីៗ នឹងបង្កើតឱកាសដើម្បីបង្កើនការផលិតជីសម្រាប់ការឧបត្ថម្ភធនជាបន្តបន្ទាប់ដល់ ៧០០ ០០០ តោន ត្រឹមឆ្នាំ ២០២៩។ លោកបានសង្កត់ធ្ងន់ថា គោលនយោបាយនេះ ឆ្លុះបញ្ចាំងពីការប្តេជ្ញាចិត្តរបស់រដ្ឋាភិបាលក្នុងការគាំទ្រដល់កសិករឥណ្ឌូណេស៊ី ដោយធានាការផ្គត់ផ្គង់ជីគ្រប់គ្រាន់ និងលទ្ធភាពទិញ ដើម្បីរក្សាសន្តិសុខស្បៀងជាតិ៕