ចំណូលពន្ធគយនៅក្នុងឆមាស​ទី១ ធ្លាក់ចុះជាង ៨.៩ ភាគរយ អ្នកជំនាញបញ្ជាក់មូលហេតុមួយចំនួន

ការប្រមូលចំណូល របស់អគ្គនាយកដ្ឋាន​គយ និង​រដ្ឋាករ​កម្ពុជា បានធ្លាក់ចុះប្រមាណ ៨.៩ ភាគរយ នៅ​ឆមាស​ទី១ ឆ្នាំ២០២១ ដែលការធ្លាក់ចុះបណ្ដាលមកពីការាលដាលនៃជំងឺកូវីដ១៩ ធ្វើឱ្យបង្អាក់សកម្មភាព​នាំចូល និង​នាំចេញទំនិញ បានទទួលរងផលប៉ះពាល់ធ្ងន់ធ្ងរពីវិបត្តិសុខភាពលើពិភពលោក។

ទិន្ន័យពីអគ្គនាយកដ្ឋានគយ និងរដ្ឋាករកម្ពុជា ដែលចេញផ្សាយកាលពីថ្ងៃពុធ នៅក្នុងឆមាសទី១ ឆ្នាំ ២០២១ អគ្គនាយកដ្ឋាន​គយ និង​រដ្ឋាករ​កម្ពុជា ប្រមូលចំណូលបង់ពន្ធចូលថវិកាជាតិ បានចំនួន បានជាង ១,១៥ ពាន់លានដុល្លារ ធ្លាក់ចុះប្រាក់ចំណូលពន្ធប្រមាណ ៨.៩ ភាគរយធៀបនឹងរយៈពេលដូចគ្នា នៅឆ្នាំ ២០២០។

លោក បណ្ឌិត ឆេង គឹមឡុង នាយក​នៃ​មជ្ឈ​មណ្ឌល​នវានុវត្តន៍​ផ្នែក​​អភិបាល​កិច្ច​ និង​ប្រជាធិបតេយ្យ​នៃ​វិទ្យា​ស្ថាន​ចក្ខុ​វិស័យ​អាស៊ី យល់ឃើញថា នៅប៉ុន្មានខែកន្លងមកសភាពការរីករាលដាល នៃជំងឺកូវីដ១៩ មានលក្ខណៈធ្ងន់ធ្ងរ ហើយនៅតែអូសបន្លាយ មិនទាន់ បានធូរស្បើយ។ ការរីករាលដាលនៃជំងឺនេះ មិនមែនតែ ស្ថិតនៅក្នុងប្រទេសកម្ពុជាទេ ទាំងបណ្ដាប្រទេសមួយចំនួនទៀត នៅជិតភូមិផងរបងជាមួយកម្ពុជា និងបណ្ដាប្រទេសដែលជាទីផ្សារនាំចេញរបស់កម្ពុជា។

លោក បណ្ឌិត ឆេង គឹមឡុងលើកឡើងថា “កាលពីលើកមុនយើងដឹងហើយ អឺរ៉ុប មានការធូរស្បើយ អាមេរិកមានការធូរស្បើយ ជប៉ុនមានការធូរស្បើយ ប៉ុន្តែឥឡូវនេះ ទីផ្សារទាំងអស់នោះ កំពុងតែប្រឈមទៅនឹងការរីករាលដាល ហើយប្រទេសមួយចំនួនទៀត ដែលជាទីផ្សារសម្រាប់ទំនិញកសិកម្ម និងទំនិញវាយនភណ្ឌមួយចំនួន នៅក្នុងតំបន់ អាស៊ីអាគ្នេយ៍យើង ក៏រងផលប៉ះពាល់យ៉ាងខ្លាំងដែរ ដែលចំណុចទាំងអស់នេះ ធ្វើឱ្យមានការធ្លាក់ចុះនៃការនាំចេញទំនិញមួយចំនួន”។

ចំណូលពីយានយន្ត និងគ្រឿងចក្រមានចំនួន ១,៩៨៥.៥ ប៊ីលានរៀល គ្របដណ្តប់ ៤២.៣% នៃចំណូលសរុប, ទំនិញចម្រុះមានចំនួន ១,៣១៦.៣ ប៊ីលានរៀល ត្រូវជា ២៨%នៃចំណូលសរុប, ផលិតផលតេល សិលាមាន ចំនួន ១,១០១.៩ ប៊ីលានរៀល ស្មើនឹង ២៣.៥% នៃចំណូលសរុប និង សម្ភារសំណង់និងកម្រៃផ្សេងៗ មាន ចំនួន ២៩២.២ ប៊ីលានរៀល ស្មើនឹង ៦.២%នៃចំណូលសរុប។

ការនាំចេញផលិតផលកាត់ដេរមានចំនួន ៤,៧២១.៤ លានដុល្លារអាមេរិក កើនឡើងប្រមាណ ៤០.១ លានដុល្លារ អាមេរិក ស្មើនឹង ០.៩%។

ការនាំចេញផលិតផលវិនិយោគមិនមែនកាត់ដេរ (ដូចជា កង់ គ្រឿងបំណែកអេឡិចត្រូនិក បង្គុំខ្សែភ្លើង គ្រឿង បន្លាស់រថយន្ត អំពូលលម្អ កុងផ្លាកេ និងផលិតផល ឧស្សាហកម្មផ្សេងៗទៀត) មានចំនួន ១,៨៩៩.៧ លាន ដុល្លារអាមេរិក កើនឡើងប្រមាណ ៦៣២.៥លានដុល្លារអាមេរិក ស្មើនឹង ៤៩.៩%។

យ៉ាងណាបើតា លោក បណ្ឌិត ឆេង គឹម ឡុង ទំនិញកសិកម្មមួយចំនួន ឃើញកើនឡើងក៏ពិតមែន ក៏ប៉ុន្តែមុខទំនិញខ្លះក៏ប៉ះពាល់ មិនអាចនាំចេញទៅបានដែរ ហើយផ្នែកសំលៀកបំពាក់ក៏ដូចគ្នាដែរ មានប្រភេទខ្លះក៏ធ្លាក់ចុះដែរ។

បើនិយាយជារួម គឺផ្នែកនាំចេញរបស់កម្ពុជា នៅពេលដែលទីផ្សារនាំចេញរបស់កម្ពុជាកំពុងរងផលប៉ះពាល់ ធ្វើឱ្យការប្រមូលពន្ធធ្លាក់ចុះចឹងហើយ៕ ដោយៈ ឡេង ដេត