ម្ចាស់អាជីវកម្មមួយចំនួនងាកមកកែច្នៃគធ្វើចំណីសត្វ និងក្រណាត់ធ្វើសម្លៀកបំពាក់

មនុស្សជាច្រើន មិនបានដឹងពីអត្ថប្រយោជន៍នៃដើមគដែលដុះនៅជុំវិញផ្ទះថា មានសារៈសំខាន់យ៉ាងណានោះទេ។ ប៉ុន្តែមានម្ចាស់អាជីវកម្មមួយចំនួន ដែលស្គាល់ពីតម្លៃនៃដើម ស្លឹក និងផ្លែគ បានចាប់ផ្តើមយកវាទៅកែច្នៃចេញ​ជាលទ្ធផលផ្សេងៗ។

ជាក់ស្តែងលោក ហេង​ មករា ម្ចាស់អាជីវកម្មធ្យូងអនាម័យ បាននិងកំពុងដាំដើមគលើផ្ទៃដីចំនួន ២០ហិកតា នៅ​ខេត្តកំពង់ឆ្នាំង ដើម្បីត្រៀមកែច្នៃធ្វើជាចំណីសត្វ និងធូបជាដើម។ លោក ហេង មករា បានប្រាប់កម្ពុជាថ្មីថា ដើមគ មានអាយុ ២ឆ្នាំ ក្រោយពេលដាំអាចប្រមូលផលជាស្លឹកបាន។ លោកបានឱ្យដឹងដូច្នេះថា «សម្រាប់សិប្បកម្មធ្វើធូប គេត្រូវការស្លឹកគ ដោយសារស្លឹកគស្អិត ស្រួលមូរ​ និងឆេះល្អ»។ លើសពីនេះទៀត ស្លឹកគ គេអាចប្រើប្រាស់លាយ​ជាមួយចំណីសត្វ មានដូចជា ចំណីសត្វមាន់ ត្រី ជ្រូក គោ ​ដោយក្នុងស្លឹកគ មានប្រូតេអ៊ីនខ្ពស់ ធ្វើឱ្យសត្វលូតលាស់​បានលឿន។ ជាងនេះទៀត ផ្កាគ អាចមានប្រយោជន៍ដល់ការចិញ្ចឹមឃ្មុំ ដែលអាចទទួលបានទឹកឃ្មុំផ្អែមល្អទៀតផង។ ចំណែកដើមធំៗ មានអាយុច្រើន អាចកែច្នៃធ្វើជាក្តារពុម្ពបម្រើដល់ការសាងសង់ផ្សេងៗ។ នេះជាការបញ្ជាក់របស់លោក ហេង មករា។

ទន្ទឹមនឹងនេះ អ្នកស្រី តិច ស៊ីមហ៊ាង ម្ចាស់ហាងកីមាស ក៏បានទាញផលប្រយោជន៍ពីផ្លែគផងដែរ។ បច្ចុប្បន្នអ្នកស្រី ស៊ីមហ៊ាង បានកែច្នៃសំឡីគរត្បាញជាអម្បោះចេញជាក្រណាត់ធ្វើសម្លៀកបំពាក់។ ដូច្នេះអាវក្រណាត់គ នឹងមានវត្ត​មាននៅ​លើទីផ្សារឆាប់ៗនេះ។ អ្នកស្រីបន្តថា សំឡីគងាយស្រួលក្នុងការកែច្នៃ ដោយគ្រាន់តែយកមកបញ្ចូល​ក្នុងឧបករណ៍រហាត់រវៃ ដើម្បីឱ្យចេញជាអម្បោះ សម្រាប់ត្បាញធ្វើជាក្រណាត់អាចច្នៃធ្វើជាអាវបាន។ អាវដែល​ធ្វើចេញពីគ មានសាច់ត្រជាក់ និងស្រាលស្រួលពាក់។

ម្ចាស់ហាងកីមាស អ្នកស្រី តិច ស៊ីមហ៊ាង បានគូសបញ្ជាក់ថា ការរកឃើញគំនិតថ្មីនេះ គឺជាការរួមចំណែកផ្តល់​ការងារដល់ស្រ្តីនៅក្នុងតំបន់ផង និងសាងកេរ្តិ៍ឈ្មោះផលិតផលខ្មែរ ដែលមានគុណភាពសម្រាប់នាំ​ចេញទៅ​ទីផ្សារអន្តរជាតិផង។

របកគំហើញថ្មីនេះ គឺជាការរួមចំណែករបស់កូនខ្មែរ កែច្នៃផលិតផលក្នុងស្រុក ដើម្បីប្រើប្រាស់ឱ្យអស់លទ្ធភាព ទៅលើ​វត្ថុធាតុ​ដើមដែលមានស្រាប់។ កន្លងមកពលរដ្ឋខ្មែរ ដឹងត្រឹមថា គរអាចប្រើប្រាស់ធ្វើជាសំឡីសម្រាប់​ជាខ្នើយ​កើយ​ប៉ុណ្ណោះ។ តែបច្ចុប្បន្នកូនខ្មែរ សម័យទំនើបតែងតែរិះរកគំនិតថ្មីៗ ដើម្បីអភិវឌ្ឍន៍ផលិតផល​ក្នុងស្រុក​ដែលមានស្រាប់ ជួយដល់កសិករ និងសង្គមជាតិ តាមរយៈកែច្នៃផលិតផលដែលមានគុណភាពសម្រាប់​នាំចេញ​ទៅទីផ្សារអន្តរជាតិ។ លើសពីនេះទៀត វត្ថុធាតុដើមនៅក្នុងស្រុកងាយស្រួលរក និងមានតម្លៃធូរថ្លៃ ដែលផ្តល់​ឱកាសទទួលបានប្រាក់​ចំណេញខ្ពស់៕ អត្ថបទ៖ ទួន សុផល