លោក ស៊្រុន ពៅ៖ កម្ពុជា អាចផ្គត់ផ្គង់ជ្រូកគ្រប់គ្រាន់សម្រាប់រដូវភ្ជុំបិណ្ឌខាងមុខ

សមាគមចិញ្ចឹមសត្វកម្ពុជា បានលើកឡើងថា នៅរដូវភ្ជុំបិណ្ឌខាងមុខ តម្រូវការជ្រូកនឹងមានការកើនឡើង។ ជាមួយនឹងការកើនឡើងនេះ កម្ពុជាអាចផ្គត់ផ្គង់គ្រាប់គ្រាន់តាមតម្រូវការ។

លោក ស្រ៊ុន ពៅ ប្រធានសមាគមចិញ្ចឹមសត្វកម្ពុជា បានប្រាប់ “កម្ពុជាថ្មី” ថា នៅក្នុងពេលរដូវដាក់បិណ្ឌ និងភ្ជុំបិណ្ឌខាងមុខ បរិមាណនៃតម្រូវការសាច់ជ្រូក ប្រាកដជាមានការកើនឡើងជាក់ជាមិនខាន។ ប៉ុន្តែក្នុងបរិមាណ ជាក់លាក់ណាមួយ គឺមិនអាចកំណត់បានទេ វាអាស្រ័យទៅលើភាពជាក់ស្តែង។

លោកស្រ៊ុន ពៅ បានបន្ថែមថា ពាក់ព័ន្ធនឹងការផ្គត់ផ្គង់សាច់ជ្រូកនៅក្នុងស្រុក គឺមិនខ្វះនោះទេ សម្រាប់ការផ្គត់ផ្គង់ក្នុងពេលភ្ជុំបិណ្ឌ។ លោកបន្ថែមដូច្នេះ ” ការចិញ្ចឹមជ្រូកនៅស្រុកខ្មែរ គឺមានបរិមាណច្រើនហួសពីតម្រូវការទៅទៀត។ សព្វថ្ងៃ ការផ្គត់ផ្គង់ជ្រូកនៅក្នុងស្រុក មានចំនួនប្រហែល ៩ពាន់ក្បាល ក្នុងមួយថ្ងៃ រីឯតម្លៃនៃការលក់វិញ គឺក្នុងមួយគីឡូ ត្រឹមតែ ១០៥០០រៀលប៉ុណ្ណោះ សម្រាប់ជ្រូករស់”។

ប្រធានសមាគមអះអាង នៅក្នុងរដូវភ្ជុំបិណ្ឌនឹងមិនមានការដំឡើងថ្លៃជ្រូកនោះទេ។ ពោលគឺជ្រូករស់ លក់ក្នុងតម្លៃប្រហែល ៣០០ដុល្លារ សម្រាប់ជ្រូក ១០០គីឡូក្រាម ដែលអ្នកចិញ្ចឹមអាចទទួលបានប្រាក់ចំណេញខ្លះ។

ជាមួយនឹងកំណើននៃការផ្គត់ផ្គង់គ្រប់តម្រូវការនេះ លោក ស្រ៊ុន ពៅ ក៏បានស្នើដល់រាជរដ្ឋាភិបាលជួយទប់ស្កាត់ការនាំចូលសាច់ក្លាសេពីប្រទេសជិតខាង ដែលខូចគុណភាព នៅតែបន្តលួចនាំចូលពីក្រៅប្រទេស។ ជាក់ស្តែង បច្ចុប្បន្ន រាជរដ្ឋាភិបាលបានបិទមិនឱ្យមានការនាំចូលជ្រូកពីប្រទេសជិតខាង ដើម្បីជួយលើកកម្ពស់ផលិតផលក្នុងស្រុក។

សូមបញ្ជាក់ថា ពិធីបុណ្យភ្ជុំបិណ្ឌ និងកាន់បិណ្ឌ នាឆ្នាំនេះ ត្រូវប្រារព្ធធ្វើឡើងចាប់ពី ថ្ងៃទី ១១ ខែ កញ្ញា ដល់ថ្ងៃទី ២៦ ខែកញ្ញា ឆ្នាំ ២០២២។

អត្ថបទ៖ នាង រតនៈ