គម្រោងវិនិយោគធំៗ ៤ បានដំណើរការក្នុងឆ្នាំ ២០២២ ជាផ្នែកជួយកំណើនសេដ្ឋកិច្ចជាតិ

កម្ពុជា ទទួលបានការស្នើសុំដំណើរការគម្រោងវិនិយោគជាច្រើន និងបានអនុម័តឱ្យគម្រោងទាំងនោះ ដំណើរការសង្វាក់​ផលិតកម្មរបស់ខ្លួន ដើម្បីបង្កើនចំណូលសេដ្ឋកិច្ចជាតិ និងបង្កើតការងាររាប់ម៉ឺនកន្លែងដល់ពលរដ្ឋខ្មែរ។

ជាក់ស្តែង រយៈពេល ៨ខែ ឆ្នាំ ២០២២នេះ ក្រុមប្រឹក្សាអភិវឌ្ឍន៍កម្ពុជា បានសម្រេចអនុម័តគម្រោងស្នើសុំវិនិយោគចំនួន ១១២ គម្រោង រួចមកហើយ។

ក្នុងគម្រោងទាំងអស់នោះ មានគម្រោងធំចំនួន ៤ ដែលបានស្នើសុំវិនិយោគផងដែរ។ គម្រោងទាំងបួននោះរួមមាន៖

ទី១ គម្រោងអាជីវកម្មសណ្ឋាគារថ្នាក់ផ្កាយ៥ ចំនួន ៥២៨បន្ទប់ ដែលមានទីតាំងវិនិយោគស្ថិតនៅមហាវិថីព្រះមុនីវង្ស សង្កាត់បឹងកេងកងទី៣ ខណ្ឌបឹងកេងកង រាជធានីភ្នំពេញ មានទុនវិនិយោគចំនួន ១២៩ លានដុល្លារអាមេរិក ។ ទី២ គម្រោងបង្កើតរោងចក្រផលិតសំបកកង់យានយន្តគ្រប់ប្រភេទស្ថិតនៅក្នុងតំបន់សេដ្ឋកិច្ចពិសេសក្រុងព្រះសីហនុ, ខេត្តព្រះសីហនុ, មានទុនវិនិយោគប្រមាណ ២៩៧លានដុល្លារអាមេរិក។ ទី៣

គម្រោងវិនិយោគអភិវឌ្ឍន៍វារីអគ្គិសនីស្ទឹងតាតៃលើ អានុភាព ១៥០ MW ដែលមានទីតាំងវិនិយោគស្ថិតនៅស្រុកថ្មបាំង និងស្រុកកោះកុង ខេត្តកោះកុង មានទុនវិនិយោគប្រមាណ ៣៨៩ លានដុល្លារអាមេរិក និងទី៤ គម្រោងវិនិយោគអភិវឌ្ឍន៍មណ្ឌល ភ័ស្តុភារកម្ម និងកំពង់ផែពហុបំណង ដែលមានទីតាំងវិនិយោគស្ថិតនៅភូមិចង្ហោន សង្កាត់ព្រែកត្នោត ក្រុងបូកគោ ខេត្តកំពត មានទុនវិនិយោគចំនួន ១.៣០០លានដុល្លារអាមេរិក។

សូមបញ្ជាក់ថា ក្រុមប្រឹក្សាអភិវឌ្ឍន៍កម្ពុជា ដែលហៅកាត់ថា បានអនុម័តគម្រោងវិនិយោគចំនួន១១២គម្រោង មានទុនជាង៣០៤៣លានដុល្លារអាមេរិកបង្កើតឱកាសការងារជូនប្រជាពលរដ្ឋចំនួន៧៥៣៤៣កន្លែង នៅក្នុងរយៈពេល៨ខែឆ្នាំ២០២២នេះ៕