កម្ពុជានឹងដាក់ចេញគោលនយោបាយ​ជាតិស្តីពីដំណាំស្វាយ​​ចន្ទី​ ដើម្បីទាក់ទាញវិនិយោគិនធំៗ

ក្រសួងពាណិជ្ជកម្មនឹងត្រៀមដាក់ចេញគោលនយោបាយជាតិស្តីពីដំណាំស្វាយចន្ទី នាពេលឆាប់ខាងមុខនេះ ដើម្បីធ្វើការទាក់ទាញវិនិយោគធំៗពីក្រៅប្រទេស និងបង្កើនទីផ្សារនាំចេញបន្ថែម។

លោក ប៉ាន សូរស័ក្ក រដ្ឋមន្រ្តីក្រសួងពាណិជ្ជកម្ម បានឲ្យដឹងថា «បច្ចុប្បន្ន សេចក្តីព្រាងនយោបាយជាតិនេះ បានជិតបញ្ចប់ហើយ ដែលអាចនឹងដាក់ចេញជាផ្លូវការនៅក្នុងឆ្នាំនេះព្រោះថា ដើម្បីឈានទៅទាក់ទាញវិនិយោគគិនធំៗពីក្រៅប្រទេសឱ្យមកវិនិយោគលើដំណាំនេះបាន លុះត្រាតែកម្ពុជាមានគោលនយោបាយច្បាស់លាស់»។

លោកបានបញ្ជាក់ថា ក្រៅពីគោលនយោបាយជាតិស្តីពីដំណាំស្វាយចន្ទី ក្រសួងក៏កំពុងរៀបចំគោលនយោបាយជាតិស្តីម្រេចផងដែរ។ ដំណាំស្វាយចន្ទីរគឺជាដំណាំមានសក្តានុពលក្នុងការជួយឱ្យកម្ពុជាសម្រេចបាននូវគោលដៅនាំចេញផលិតផលកសិកម្មរបស់ខ្លួនឱ្យកើនឡើង ១២%នៅឆ្នាំ ២០២៥ ប៉ុន្តែបច្ចុប្បន្នទើបតែមានរោងចក្រកែច្នៃគ្រាប់ចន្ទីមិនដល់១០នោះទេ។

យោងតាមរបាយការណ៍របស់ក្រសួងកសិកម្ម បានឱ្យដឹងថា កាលពីឆ្នាំ២០២០ កម្ពុជាបាននាំចេញស្វាយចន្ទីចំនួនជិត២២ម៉ឺនតោន កើនឡើងចំនួនជាង៨%  ទៅកាន់ទីផ្សារសំខាន់ៗមួយចំនួនដូចជា វៀតណាម ថៃ ជប៉ុន រុស្ស៊ី ចិន ហុងកុង បារាំង កូរ៉េ តួកគី និងបង់ក្លាដែស៕

អត្ថបទ៖ សំអឿន