ខេត្តកណ្តាលនឹងមានរោងចក្រដំឡើង​យានយន្តដើរដោយថាមពលអគ្គិសនី

ក្រុមប្រឹក្សាអភិវឌ្ឍន៍កម្ពុជា បានសម្រេចចេញវិញ្ញាបនបត្រចុះបញ្ជីជាស្ថាពរដល់ក្រុមហ៊ុនចំនួន ២ គឺទីមួយក្រុមហ៊ុន “ONION MOBILITY CO., LTD” ដែលមានគម្រោងសាងសង់រោងចក្រផ្គុំ នឹងដំឡើងទោចក្រយានយន្ត និងត្រីចក្រយានយន្តប្រើដោយថាមពលអគ្គិសនី។

គម្រោងបង្កើតរោងចក្រនេះ ស្ថិតនៅក្នុងក្នុងតំបន់សេដ្ឋកិច្ចពិសេស សុវណ្ណភូមិ ខេត្តកណ្តាល ដែលមានទុនវិនិយោគប្រមាណ ២០ លានដុល្លារអាមេរិក ដែលអាចបង្កើតការងារបានចំនួន ៣៨០ កន្លែង។

គម្រោងបង្កើងរោងចក្រមួយទៀតគឺជាគម្រោងរបស់ក្រុមហ៊ុន “SHANE (CAMBODIA) FURNITURE CO., LTD” គឺជាគម្រោងបង្កើតរោងចក្រផលិតសាឡុង គ្រែ និងគ្រឿងសង្ហារឹមគ្រប់ប្រភេទ ដែលមានទីតាំងវិនិយោគស្ថិតនៅក្នុងតំបន់សេដ្ឋកិច្ចពិសេស ស៊ីន បាវិត ខេត្តស្វាយរៀង។

គម្រោងសាងសង់រោងចក្រនេះ មានទុនវិនិយោគប្រមាណ ៤៧,៧​លានដុល្លារអាមេរិក និងអាចបង្កើតការងារបានចំនួន ៨២០កន្លែង៕

អត្ថបទ៖ ឡេង ដេត