លោក ពូទីន បង្ហាញមហិច្ឆតា នាំ រុស្ស៊ី ចូលក្នុងចំណោមមហាអំណាចសេដ្ឋកិច្ចទាំង៤ របស់ពិភពលោក

លោក វ្ល៉ាឌីមៀរ ពូទីន បានប្រកាសថា រុស្ស៊ី​ គឺជាប្រទេសមានសេដ្ឋកិច្ចធំបំផុតប្រចាំទ្វីបអឺរ៉ុប បើគិតពីលក្ខខណ្ឌយុគភាពនៃអំណាចទិញ (PPP) ហើយបង្ហាញមហិច្ឆតា ចូលខ្លួនទៅប្រកួតប្រជែងជាមួយមហាអំណាចសេដ្ឋកិច្ចទាំង៤លើពិភពលោក។ នេះបើតាមការចុះផ្សាយរបស់គេហទំព័រ TASS កាលពីថ្ងៃព្រហស្បតិ៍ទី២៩ខែកុម្ភៈ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងសុន្ទរកថាប្រចាំឆ្នាំទៅកាន់ជនរួមជាតិនៅទីក្រុងមូស្គូ លោកប្រធានាធិបតី បានកត់សម្គាល់ថា កាលពីឆ្នាំ២០២៣ សេដ្ឋកិច្ចរុស្ស៊ី បានវ៉ាដាច់រដ្ឋ G7 រួចទៅហើយ បើគិតពីអត្រាកំណើន។

លោក ពូទីន អះអាងថា “ដោយសារតែល្បឿននិងគុណភាពនៃកំណើនបែបនេះហើយ ​មិនយូរទេពោលគឺនាពេលអនាគតដ៏ខ្លីខាងមុខ យើងនឹងបោះជំហានហើយក្លាយជាមហាអំណាចសេដ្ឋកិច្ចមួយក្នុងចំណោមមហាអំណាចទាំងបួនលើពិភពលោក ជាក់ជាមិនខាន”។

ស្របពេលជាមួយគ្នានោះ លោក ពូទីន ក៏បានណែនាំឲ្យអ្នកជំនួញរុស្ស៊ី គួរជះលុយវិនិយោគនៅក្នុងប្រទេសខ្លួនឯងវិញយល់ល្អកុំចំណាយលុយនៅបរទេសអីល្អជាង ព្រោះវាប្រថុយណាស់។

លោកព្រមានថា “អ្នកគួរតែរកវិធីដកលុយពីធនាគារលោកខាងលិច ហើយយកមកចាយក្នុងប្រទេសវិញទៅ។ ការដែលអ្នកទុកលុយក្នុងធនាគារបរទេស ពិតជាប្រឈមនឹងការបាត់បង់គ្រប់យ៉ាង”។

យោងតាមការប៉ាន់ប្រមាណរបស់ធនាគារពិភពលោក, ក្នុងឆ្នាំ២០២៣ រុស្ស៊ីគឺជាប្រទេសដែលមានសេដ្ឋកិច្ចធំជាងគេជាសកលលំដាប់ទី៥ បើគិតពី PPP និងជាប្រទេសតែមួយគត់នៅអឺរ៉ុប ដែលស្ថិតក្នុងលំដាប់កំពូលទាំងប្រាំ។

ប្រទេសឈរលេខ១ក្នុងតារាងគឺ​ចិន ខណៈលេខ២គឺ​សហរដ្ឋ​អាមេរិក ចំណែក​ឥណ្ឌាជាប់លេខ៣ និង​ជប៉ុនជាប់លេខ៤។ បន្ទាប់ពីចំណាត់ថ្នាក់លេខ៥របស់រុស្ស៊ី, ប្រទេសដែលជាប់លំដាប់ទី៦គឺឥណ្ឌូណេស៊ី ហើយអាល្លឺម៉ង់ ដែលជាប្រទេសសេដ្ឋកិច្ចធំបំផុតរបស់ EU គឺឈរលេខ៧៕

អត្ថបទ៖ សុខ សុវណ្ណ

ចុចអាន៖ លើកនេះ លោក ពូទីន ចេញមុខផ្ទាល់ គំរាមបាញ់នុយក្លេអ៊ែរ លើបស្ចិមប្រទេស