ព័ត៌មានជាតិ

លោក ស៊ុន ចាន់ថុល លើកអាទិភាព ១0 ចំណុច ដែលវិនិយោគិនគួររើសកម្ពុជាសម្រាប់បណ្តាក់ទុន

បានផុស

១ year មុន

នៅ

ថ្ងៃព្រហស្បតិ៍ ១១ មេសា ២០២៤

ដោយ

លោក ស៊ុន ចាន់ថុល អនុប្រធានទី១ ក្រុមប្រឹក្សាអភិវឌ្ឍន៍កម្ពុជា នៅក្នុងវេទិកាធុរកិច្ចភាពជាដៃគូកម្ពុជា និងក្វាងដុង-ហុងកុង-ម៉ាកាវ ដែលមានវិនិយោគិនប្រមាណ ៧០ ក្រុមហ៊ុនផ្សេងៗគ្នាចូលរួម បានគូសបញ្ជាក់ពីអាទិភាព ១០ចំណុច ដែលវិនិយោគិនគួរសិក្សា និងគួរជ្រើសរើសយកប្រទេសកម្ពុជា សម្រាប់បណ្ដាក់ទុនវិនិយោគរបស់ខ្លួន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ស៊ុន ចាន់ថុល បានបើកឱកាសដល់វិនិយោគិនដែលមកពី ៧០ក្រុមហ៊ុនផ្សេងៗគ្នា សាកសួរដោយផ្ទាល់នូវសំណួរនានាអំពីការវិនិយោគនៅកម្ពុជា ជាពិសេសគឺចំណុចអាទិភាព ក៏ដូចជាទីផ្សារក្នុងប្រទេសកម្ពុជាផងដែរ។

ជាក់ស្តែង លោកឧបនាយករដ្ឋមន្ត្រី បានសង្កត់ធ្ងន់អំពីហេតុផលជាច្រើន ដែលវិនិយោគិនគួរជ្រើសយកកម្ពុជា សម្រាប់ការបណ្ដាក់ទុន។ ក្នុងនោះ លោកបានលើកឡើងពីអាទិភាព ១០ ចំណុច រួមមាន ទី១. ដោយផ្ដើមចេញពីកត្តាសុខសន្តិភាព, ទី២. ស្ថិរភាពនយោបាយ, ទី៣. កំណើនសេដ្ឋកិច្ច, ទី៤. ស្ថិរភាពម៉ាក្រូសេដ្ឋកិច្ច, ទី៥. ធនធានមនុស្ស, ទី៦. ហេដ្ឋារចនាសម្ព័ន្ធសង្គម, ទី៧. ច្បាប់វិនិយោគដែលមានភាពបើកចំហរជូនវិនិយោគិន, ទី៨. វេទិការដ្ឋាភិបាល និងផ្នែកឯកជនសម្រាប់ដោះស្រាយបញ្ហាប្រឈមនានារបស់វិនិយោគិន, ទី៩. ស្ថានភាពទីផ្សាររបស់កម្ពុជាដែលភ្ជាប់ទៅកាន់ពិភពលោកតាមរយៈកិច្ចព្រមព្រៀងពាណិជ្ជកម្មជាច្រើនរួមមាន អាស៊ាន (AFTA) កិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយតំបន់ (RCEP) និងទី១០. ប្រព័ន្ធអនុគ្រោះពន្ធ EBA ជាដើម។

គួរបញ្ជាក់ថា វេទិកាធុរកិច្ចត្រូវបានរៀបចំឡើងដោយសភាពាណិជ្ជកម្មចិន រួមសហការជាមួយសហភាពសហគ្រិនតំបន់ឈូងសមុទ្រពិសេស ក្វាងទុង-ហុងកុង-ម៉ាកាវ (GBA) ដើម្បីបញ្ជ្រាបផ្សព្វផ្សាយសក្ដានុពលរបស់ប្រទេសកម្ពុជាទៅវិនិយោគិនប្រមាណ ៧០ ក្រុមហ៊ុនផ្សេងៗគ្នាលើវិស័យជាច្រើន៕