សេដ្ឋកិច្ច

ឥណ្ឌូណេស៊ីកំណត់គោលដៅទាញប្រេង និងឧស្ម័ន ១,៦ លានបារ៉ែល/ថ្ងៃនៅឆ្នាំ ២០២៥

បានផុស

២ years មុន

នៅ

ថ្ងៃចន្ទ ១០ មិថុនា ២០២៤

ដោយ

ក្រសួងថាមពល និងធនធានរ៉ែនៃប្រទេសឥណ្ឌូណេស៊ី បានកំណត់គោលដៅផលិតកម្មប្រេង និងឧស្ម័នសម្រាប់ឆ្នាំ ២០២៥ ឱ្យសម្រេចបានប្រហែល ១,៦ លានបារ៉ែលក្នុងមួយថ្ងៃ (BOEPD) ។ នេះបើតាមការចុះផ្សាយរបស់សារព័ត៌មានក្នុងស្រុក Jakarta Globe។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

រដ្ឋមន្ត្រីរបស់ក្រសួង លោក Arifin Tasrif បានថ្លែងក្នុងអំឡុងកិច្ចប្រជុំការងារជាមួយគណៈកម្មការទី ៧ នៃសភាតំណាងរាស្រ្ត (DPR) កាលពីសប្ដាហ៍មុនថា ដោយមើលលើផលិតកម្មត្រឹមខែឧសភា ឆ្នាំ ២០២៤ និងទស្សនវិស័យឆ្នាំ ២០២៤ ការទាញយកប្រេង និងឧស្ម័នដែលបានស្នើ ត្រូវបានកំណត់នៅប្រហែល ១,៥៨៣-១,៦៤៨ លាន BOEPD។

លោក Arifin បានគូសបញ្ជាក់ជាលម្អិតថា គោលដៅដែលបានស្នើឡើងសម្រាប់ឆ្នាំ ២០២៥ រួមមានការទាញយកប្រេងឆៅពី ៥៨០ ០០០ – ៦០១ ០០០ BOPD និងការទាញយកឧស្ម័នធម្មជាតិពី១,០០៣- ១,០៤៧ លាន BOEPD ។ គិតត្រឹមខែឧសភា ឆ្នាំ ២០២៤ ការទាញយកប្រេងមានចំនួន ៥៥៧ ៨០០ BOPD ដោយសម្រេចបាន ៩១ ភាគរយនៃគោលដៅ ៦៣៥ ០០០ BOPD ។

ទន្ទឹមនឹងគ្នានេះ លោក Arifin Tasrif ក៏បានព្យាករតម្លៃប្រេងឆៅឥណ្ឌូណេស៊ី (ICP) ចន្លោះពី ៧៥ ទៅ ៨៥ ដុល្លារ/បារ៉ែល ក្នុងសេចក្តីព្រាងថវិការដ្ឋឆ្នាំ ២០២៥ ផងដែរ។

គួរគូសបញ្ជាក់ថា ឥណ្ឌូណេស៊ីជាប្រទេសមួយនៅអាស៊ីអាគ្នេយ៍ដែលមានធនធានប្រេងឆៅ និងឧស្ម័នធម្មជាតិច្រើនជាងគេ ក៏ប៉ុន្តែការទាញយករបស់ប្រទេសនេះ មិនអាចផ្គត់ផ្គង់តម្រូវការក្នុងប្រទេសរបស់ខ្លួននោះទេ។

បើតាមគេហទំព័រ Indonesia Investments ដោយសារតែការកើនឡើងនៃចំនួនប្រជាជន និងកំណើនសេដ្ឋកិច្ច តម្រូវការប្រេងឥន្ធនៈកំពុងកើនឡើងជាបន្តបន្ទាប់នៅឥណ្ឌូណេស៊ី។ សព្វថ្ងៃ ឥណ្ឌូណេស៊ីត្រូវបានគេប៉ាន់ស្មានថា មានតម្រូវការប្រេងប្រហែល ១ ៦០០ ០០០ លានបារ៉ែល/ថ្ងៃ យ៉ាងណាមិញ អាចផលិតបានត្រឹមតែ ៦០០ ០០០ បារ៉ែល/ថ្ងៃប៉ុណ្ណេះ ដែលទាមទារឱ្យខ្លួននាំចូលប្រេងពីបរទេស៕

Related Topics:ប្រេង