ព័ត៌មានអន្ដរជាតិ

រដ្ឋាភិបាលថៃអនុម័តផែនការកម្ចីដែលមានការប្រាក់ទាបចំនួន ២,៨ ប៊ីលានដុល្លារ ដល់ធនាគារពាណិជ្ជ

បានផុស

២ years មុន

នៅ

ថ្ងៃអង្គារ ១៦ កក្កដា ២០២៤

ដោយ

អនុរដ្ឋមន្ត្រីក្រសួងហិរញ្ញវត្ថុថៃបានឱ្យដឹងថា គណៈរដ្ឋមន្ត្រីថៃនាថ្ងៃអង្គារនេះ បានអនុម័តលើផែនការកម្ចីសម្បទានដែលមានអត្រាការប្រាក់ទាបសម្រាប់ធនាគារពាណិជ្ជ ចំនួន ១០០ ប៊ីលានបាត (២,៨ ប៊ីលានដុល្លារ) ដើម្បីឱ្យពួកគេអាចផ្តល់ប្រាក់កម្ចីដល់ប្រជាជនក្នុងអត្រាទាបជាងទីផ្សារ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការចុះផ្សាយរបស់ទីភ្នាក់ងារសារព័ត៌មានរ៉យទ័រ លោកអនុរដ្ឋមន្រ្តី Paopoom Rojanasakul បានប្រាប់អ្នកយកព័ត៌មានក្រោយកិច្ចប្រជុំគណៈរដ្ឋមន្ត្រីថា ផែនការកម្ចីសម្បទាននេះមានគោលបំណងជួយអាជីវកម្មខ្នាតតូច ឱ្យទទួលបានប្រាក់កម្ចី។

លោកបានបញ្ជាក់ថា ធនាគាររដ្ឋថៃ Government Savings Bank នឹងផ្តល់សាច់ប្រាក់ងាយស្រួលដល់ធនាគារពាណិជ្ជ តាមរយៈប្រាក់កម្ចីក្នុងអត្រាការប្រាក់ ០,០១ ភាគរយ ដូច្នេះពួកគេអាចផ្តល់ប្រាក់កម្ចីដល់អាជីវកម្មខ្នាតតូចក្នុងអត្រាមិនលើសពី ៣,៥ ភាគរយ សម្រាប់រយៈពេល ៣ ឆ្នាំ។ បច្ចុប្បន្ន ធនាគារថៃយកអត្រាការប្រាក់កម្ចីប្រមាណជាង ៧,១ ភាគរយ។

កន្លងមក រដ្ឋាភិបាលថៃលើកឡើងថា ផែនការនេះគឺជាការឆ្លើយតបទៅនឹងការរឹតបន្តឹងការផ្តល់ប្រាក់កម្ចីដោយធនាគារ ចំពេលដែលសេដ្ឋកិច្ចថៃស្ទុះងើបឡើងវិញក្នុងកំណើនយឺតយ៉ាវ និងមានការកើនឡើងនៃបំណុលពិបាកទារ (Bad Debt)។

កាលពីខែមេសា បណ្ដាធនាគារថៃបាននិយាយថា ពួកគេនឹងកាត់បន្ថយអត្រាការប្រាក់កម្ចីចំនួន ០,២៥ ភាគរយសម្រាប់ក្រុមអ្នកខ្ចីងាយរងគ្រោះក្នុងរយៈពេល៦ខែ ដើម្បីឆ្លើយតបទៅនឹងសំណើរបស់នាយករដ្ឋមន្ត្រី សេដ្ឋា ថាវីស៊ីន។

កន្លងមក លោក សេដ្ឋា បានដាក់សម្ពាធម្តងហើយម្តងទៀតឱ្យធនាគារកណ្តាលកាត់បន្ថយអត្រាការប្រាក់ដើម្បីជួយសេដ្ឋកិច្ច ប៉ុន្តែធនាគារកណ្តាលថៃ នៅតែរក្សាអត្រាការប្រាក់របស់ខ្លួនឱ្យនៅថេរត្រឹម ២,៥០ ភាគរយ។

ធនាគារកណ្តាលរំពឹងថា សេដ្ឋកិច្ចថៃនឹងកើនឡើង ២,៦ ភាគរយនៅឆ្នាំនេះ បន្ទាប់ពីកំណើន ១,៩ ភាគរយកាលពីឆ្នាំមុន ដែលមានភាពយឺតយ៉ាវខ្លាំង បើប្រៀបធៀបនឹងប្រទេសភាគច្រើនក្នុងតំបន់៕

Related Topics:ប្រទេសថៃ