ហាងឆេងមាសធ្លាក់ចុះ តែអ្នកជំនាញថា មាសនៅតែរក្សាតម្លៃខ្ពស់

តម្លៃមាសនៅក្នុងស្រុក​បានធ្លាក់ចុះ​បន្តិចនៅរយៈពេលប៉ុន្មានថ្ងៃនេះ ស្របពេលដែលតម្លៃមាសអន្តរជាតិមានការធ្លាក់ចុះ​ខណៈអ្នកជំនាញយល់ថា តម្លៃ​ហាង​​​ឆេងមាសនៅតែរក្សាតម្លៃខ្ពស់នៅឡើយ។

អាជីវករលក់មាសនៅផ្សារជម្ពូវ័ន បានប្រាប់ថា តម្លៃហាងឆេងមាសនៅព្រឹកថ្ងៃទី ០៧ ខែសីហា ឆ្នាំ ២០២៤ នេះ ធ្លាក់ចុះមកនៅ ២៨៧ ដុល្លារ ក្នុងមួយជី។

លោក ឡុង សំណាង ​ប្រធានផ្នែកប្រឹក្សាយោបល់ហិរញ្ញវត្ថុនៅក្រុមហ៊ុន ​PP Link securities កាលពីសប្ដាហ៍មុន ព័ត៌មាននៅសហរដ្ឋអាមេរិកមិនល្អ បានធ្វើឱ្យតម្លៃមាសបាន​ស្ទុះឡើ​ង​​រហូត​ទៅដល់ ២៤៧៦ ដុល្លារ ក្នុងមួយអោន ប៉ុន្តែចាប់ពីថ្ងៃទី ០២ រហូតដល់ថ្ងៃទី ៧ ខែសីហានេះ តម្លៃហាងឆេងមាសមានទំនោធ្លាក់ចុះបន្តិចម្ដងៗ ក្នុងមួយថ្ងៃរហូតដល់ ២០ ទៅ ៣០ ដុល្លារ ក្នុងមួយតម្លឹង។

នៅថ្ងៃទី ០៧ ខែសីហានេះ តម្លៃមាសនៅសល់ ២៣៨៤ ដុល្លារ ក្នុងមួយអោន ស្មើនឹងជាង ២៨៧០ ដុល្លារក្នុងមួយតម្លឹងនៅកម្ពុជា។

លោក ឡុង សំណាង បញ្ជាក់ថា តម្លៃហាងឆេងនេះ មិនមានការធ្លាក់ថ្លៃខ្លាំងនោះទេ ដោយ​សារ​តែ​តម្លៃហាងឆេងមាសបច្ចុប្បន្ន មិនទាន់ជាតម្លៃទាបនៅឡើយទេ ពោលគឺនៅរក្សាតម្លៃខ្ពស់​នៅ​ឡើយ។

លោក ឡុង សំណាង ប្រសិនបើមិនមានភាពតានតឹងភូមិសាស្ត្រនយោបាយទេ តម្លៃហាងឆេង​មាស​​នឹងមានការធ្លាក់ចុះបន្តិចម្ដងៗ ខណៈបើមានព័ត៌មានក្ដៅកើតឡើងវិញ បែរជាតម្លៃមាស​ហក់​​ឡើង​មួយថ្ងៃរហូតដល់ ១០០ ទៅ ២០០ ដុល្លារ ក្នុងមួយតម្លឹង៕

អត្ថបទ៖ ឡេង ដេត