ព័ត៌មានអន្ដរជាតិ

ថៃត្រូវទាញភ្ញៀវទេសចរអន្តរជាតិ ១០ លាននាក់ ក្នុងត្រីមាសទី៤ ដើម្បីសម្រេចគោលដៅប្រចាំឆ្នាំ

បានផុស

២ years មុន

នៅ

ថ្ងៃអង្គារ ៨ តុលា ២០២៤

ដោយ

អាជ្ញាធរទេសចរណ៍ថៃ (TAT) បានឱ្យដឹងថា ប្រទេសថៃត្រូវទាក់ទាញភ្ញៀវទេសចរអន្តរជាតិឱ្យបាន ១០,៥ លាននាក់ក្នុងត្រីមាសទី៤ ដើម្បីសម្រេចបានគោលដៅភ្ញៀវ ៣៦,៧ លាននាក់ ដែលកំណត់សម្រាប់ឆ្នាំ ២០២៤។ នេះបើតាមការចុះផ្សាយរបស់កាសែតបាងកកប៉ុស្តិ៍នាថ្ងៃអង្គារនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជាសុទិដ្ឋិនិយម ប្រធាន TAT លោកស្រី Thapanee Kiatphaibool បានថ្លែងថា ការទាក់ទាញភ្ញៀវបរទេសយ៉ាងហោចណាស់ឱ្យបាន ៣,៥ លាននាក់ ក្នុង១ខែៗក្នុងអំឡុងត្រីមាសចុងក្រោយនៃឆ្នាំនេះ អាចសម្រេចទៅបាន ដោយសារតែការផ្សព្វផ្សាយផ្សេងៗ ព្រឹត្តិការណ៍ជាច្រើន និងការកើនឡើងនៃកៅអីយន្តហោះ ជាពិសេសពីផ្លូវជើងហោះហើរថ្មីៗ។

លោកស្រី Thapanee បានបន្តថា ជើងហោះហើរចូលថ្មីៗ មានមកពីប្រទេសជាច្រើនដូចជា ចិន ឥណ្ឌា អារ៉ាប៊ីសាអូឌីត រុស្ស៊ី ចក្រភពអង់គ្លេស អាល្លឺម៉ង់ ប៉ូឡូញ និងអូស្ត្រាលី។

លោកស្រីបន្ថែមថា TAT កំពុងតាមដានយ៉ាងដិតដល់នូវហានិភ័យ ជាពិសេសគ្រោះមហន្តរាយធម្មជាតិ ភាពរឹងមាំនៃប្រាក់បាត និងជម្លោះនៅមជ្ឈិមបូព៌ា ហើយបានរួមបញ្ចូលកត្តាទាំងនេះទៅក្នុងផែនការជំរុញទេសចរណ៍ឆ្នាំ ២០២៥ របស់ខ្លួន។

ជុំវិញការឡើងថ្លៃប្រាក់បាត លោកស្រី Thapanee បានលើកឡើងថា ប្រតិបត្តិករទេសចរណ៍ជាច្រើនបានត្អូញត្អែរពីបញ្ហានេះ ដោយថាវាអាចប៉ះពាល់ដល់ឧស្សាហកម្មទេសចរណ៍។ ហើយដោយផ្អែកលើហានិភ័យផ្សេងៗទាំងនោះ TAT បានព្យាករថា ប្រាក់ចំណូលពីទេសចរណ៍នៅឆ្នាំនេះនឹងឈានដល់ ២,៨ ទ្រីលានបាត ឬប្រហែល ៩៣ ភាគរយ នៃគោលដៅ ៣ ទ្រីលានបាតរបស់រដ្ឋាភិបាល៕