ទេសាភិបាលនៃធនាគារជាតិជំរុញឱ្យអ្នកលក់ដូរតាមដងផ្លូវប្រើKHQRជាប្រាក់រៀលដើម្បីងាយស្រួលភ្ញៀវទេសចរទូទាត់

លោកស្រី បណ្ឌិត ជា សិរី ទេសាភិបាលនៃធនាគារជាតិនៃកម្ពុជាបានជំរុញដល់អ្នកលក់ដូរចំណីអាហារនៅតាមដងផ្លូវទាំងអស់ត្រូវប្រើប្រាស់ KHQRជាប្រាក់រៀលដើម្បីងាយស្រួលភ្ញៀវទេសចរបរទេសទូទាត់ថ្លៃទំនិញផ្សេងៗ នៅពេលដែលពួកគេមកទស្សនា​តាមរមណីយដ្ឋាននានានៅកម្ពុជា។​

ថ្លែងក្នុងពិធីដាក់ឱ្យដំណើរការកម្មវិធីទូទាត់បាគងទេសចរ ជាមួយក្រុមហ៊ុនបណ្ដាញប័ណ្ណទូទាត់អន្តរជាតិ Mastercard នៅព្រឹកថ្ងៃទី១១វិច្ឆិកានៅធនាគារជាតិនៃកម្ពុជា លោកស្រី បណ្ឌិត ជា សិរី ​បានមានប្រសាសន៍ថាដើម្បីសម្រួលក្នុងការចាយវាយដល់ភ្ញៀវទេសចរបរទេសមកលេងប្រទេសនៅកម្ពុជាអាចស្កេនតាមកន្លែងលក់នានាតាមផ្លូវបានងាយស្រួលលុះត្រាតែអ្នកលក់ដូរត្រូវដាក់KHQRជាលុយរៀលបើគាត់អាត់ដាក់ជាលុយរៀលទេភ្ញៀវទាំងនោះមិនអាចស្កេនបានទេ។

លោកស្រីបានលើកទឹកចិត្តនិងជំរុញដល់លោកស្រីដែលធ្វើអាជីវកម្មផ្នែកវិស័យទេសចរណ៍និងតំណាងក្រសួងទេសចរណ៍សូមជួយផ្សព្វផ្សាយលើការងារនេះឱ្យកាន់តែទូលំទូលាយផងដោយឱ្យអ្នកលក់ដាក់KHQRជាលុយរៀលបើដាក់ជាដុល្លារស្កេនអត់ចេញទេលុយរៀលទើបស្កេនបានខណៈបច្ចុប្បន្នមានKHQRរហូតដល់ទៅជិត៤លានកន្លែងទូទាំងប្រទេសនិងកន្លែងអាចប្រើកាតបានមានតែ៥ម៉ឺន៥ពាន់កន្លែងនៅទូទាំងប្រទេស។

លោកជំទាវបានបន្ថែមថា៖«ភ្ញៀវទេសចរបរទេសដែលមកលេងស្រុកខ្មែរដែលប្រើកាតត្រូវភ្ជាប់អេបទួរីសបាគងរបស់ធនាគារជាតិអាចស្កេនបញ្ចូលកាតទៅក្នុងអេបហើយអាចស្កេនKHQRបានតាមទីតាំងលក់ដូរនៅទូទាំងប្រទេស»។

ក្រៅពីនេះ លោកស្រី បានលើកឡើងពីភ្ញៀវទេសចរកម្ពុជាមួយចំនួនទៅប្រទេស វៀតណាម ថៃនិងឡាវមិនអាចស្កេនបានតាមKHQR ដោយលោកស្រីបានពន្យល់ថាការចាយវាយនៅក្រៅប្រទេសដូចជាទៅប្រទសថៃ វៀតណាម និងឡាវអាចស្កេនបានសម្រាប់តែធនាគារមួយចំនួនប៉ុណ្ណោះខណៈមានធនាគារដ៏ទៃទៀតកំពុងធ្វើសន្ធានកម្មជាបណ្តើរៗដើម្បីអាចឱ្យអតិថិជនរបស់ខ្លួនអាចចាយវាយឬស្កេននៅប្រទេសទាំងនោះបាន។ប៉ុ ន្តែលុះត្រាតែអតិថិជនមានគណនីជាប្រាក់រៀលបើគាត់អត់មានទេគាត់អត់ចាយបានទេ។តែអ្វីដែលច្បាស់អាចយកទៅទូទាត់នៅតាមប្រទេសទាំងនោះបានគឺប្រើប្រព័ន្ធអេបបាគងនៃធនាគារជាតិនៃកម្ពុជា៕

អត្ថបទ៖សំអឿន