សេដ្ឋកិច្ច

ក្រុមប្រឹក្សាអភិវឌ្ឍន៍កម្ពុជា ដាក់ឱ្យប្រើប្រាស់ប្រព័ន្ធគ្រប់គ្រងគម្រោងវិនិយោគកម្ពុជា

បានផុស

២ ខែ មុន

នៅ

ថ្ងៃពុធ ២៧ វិច្ឆិកា ២០២៤

ដោយ

ក្រុមប្រឹក្សាអភិវឌ្ឍន៍កម្ពុជា នៅថ្ងៃទី ២៧ ខែវិច្ឆិកា ឆ្នាំ ២០២៤ បានដាក់ឱ្យប្រើប្រាស់ជាផ្លូវការប្រព័ន្ធគ្រប់គ្រងគម្រោងវិនិយោគកម្ពុជា (cdcIPM) ដើម្បីទាក់ទាញវិនិយោគិនមកបណ្ដាក់ទុនវិនិយោគនៅកម្ពុជា ជំរុញកំណើនសេដ្ឋកិច្ចជាតិ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រព័ន្ធ cdcIPM ផ្ដល់លទ្ធភាពឱ្យវិនិយោគិន ដាក់ពាក្យដោយផ្ទាល់ពីគ្រប់ទីកន្លែង និងគ្រប់ពេលវេលា ដើម្បីសម្រួលកិច្ចការវិនិយោគ ឱ្យកាន់តែមានភាពងាយស្រួល កាត់បន្ថយពេលវេលា ធានាតម្លាភាព និងប្រសិទ្ធភាព។

អ្នកឧកញ៉ា សៀ ឬទ្ធី អនុប្រធានសមាគមឧកញ៉ាកម្ពុជា មានប្រសាសន៍ថា ប្រព័ន្ធ cdcIPM ជាការគាំទ្រមួយដល់អ្នកវិនិយោគ បង្កភាពងាយស្រួល និងទាន់ពេលវេលា។

អ្នកឧកញ៉ា សៀ ឬទ្ធីថ្លែងថា៖ «បញ្ហាសំខាន់គឺគម្លាតរវាងអ្នកប្រកបរបរទទួលទានជាមួយបុគ្គលិករបស់ស្ថាប័ន ភាពគម្លាតគ្នា ដែលកាត់បន្ថយភាពមិនប្រក្រតីកើតឡើង ទី២ រឿងទិន្នន័យ អ្វីដែលអ្នកវិនិយោគចង់បានគឺការប្រមូលព័ត៌មាន សម្រាប់អ្នកវិនិយោគព័ត៌មានសំខាន់ អញ្ចឹងបើប្រព័ន្ធនេះកើតឡើង យើងអាចយកព័ត៌មានបាន គឺជាព័ត៌មានអ្វីដែលយើងឃើញថា យើងចង់វិនិយោគលើអ្វី ដែលអ្នករកស៊ីផ្ដោតលើឱកាស»។

អ្នកឧកញ៉ា លឹម ហេង អនុប្រធានសភាពាណិជ្ជកម្មកម្ពុជា គាំទ្រប្រព័ន្ធ cdcIPM ដែលជាថ្នាលបច្ចេកវិទ្យាសម្រាប់អនុញ្ញាតឱ្យវិនិយោគិនអាចដាក់ពាក្យស្នើសុំចុះបញ្ជីគម្រោងវិនិយោគ ដែលមានលក្ខណៈសម្បត្តិគ្រប់គ្រាន់តាមប្រព័ន្ធអនឡាញបានគ្រប់ទីកន្លែង។

អ្នកឧកញ៉ា លឹម ហេង អះអាងថា ប្រព័ន្ធនេះ នឹងសម្រួលដល់ការចុះបញ្ជីលើសកម្មភាពវិនិយោគនានា ហើយវិនិយោគិននៅទីណាក៏ដោយអាចដាក់ពាក្យស្នើសុំតាមប្រព័ន្ធអនឡាញ។

លោក ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា មានប្រសាសន៍ថា៖ «ប្រព័ន្ធ cdcIPM ផ្ដល់ភាពងាយស្រួលដល់អ្នកប្រើប្រាស់ និងការបំពេញព័ត៌មានស្នើសុំការវិនិយោគ តាមដានខ្លួនឯង ថាគម្រោងរបស់ខ្ញុំនេះ ទៅដល់ណាហើយ កុំដាក់ទៅបាត់ឈឹង ប្រព័ន្ធគ្រប់គ្រងគម្រោងវិនិយោគកម្ពុជា ជាប្រព័ន្ធរស់រវើក អ្នកវិនិយោគអាចតាមដានគ្រប់ជំហាន»។

លោកឧបនាយករដ្ឋមន្ត្រី បានបន្ថែមថា ប្រព័ន្ធ cdcIPM នឹងធ្វើការតភ្ជាប់ជាមួយក្រសួងស្ថាប័នផ្សេងៗទៀត ដូចជាក្រសួងពាណិជ្ជកម្ម ពន្ធដារ គយ ក្រសួងរៀបចំដែនដី និងនគររូបណីយកម្ម និងស្ថាប័នមួយចំនួនទៀត ដែលនឹងប្រើពេល ៦ ខែ។

យោងតាមក្រុមប្រឹក្សាអភិវឌ្ឍកម្ពុជា គិតត្រឹមខែវិច្ឆិកា ឆ្នាំ ២០២៤ គម្រោងវិនិយោគចំនួន ៣៧៩ ត្រូវបានអនុម័ត ជាមួយទុនវិនិយោគប្រមាណ ៦ ពាន់លានដុល្លារអាមេរិក៕