រដ្ឋមន្ត្រីឧស្សាហកម្ម ជំរុញប្រតិបត្តិករទឹកស្អាតពង្រឹងសមត្ថភាព និងពង្រីកការគ្របដណ្តប់សេវាឱ្យបាន ១០០% ត្រឹមឆ្នាំ២០៣០

លោក ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានជំរុញឱ្យ​ប្រតិបត្តិករ​ទឹក​ស្អាត​ទាំងអស់​នៅ​កម្ពុជា​ពង្រឹង​សមត្ថភាព ធានា​អនុលោមភាព និង​ពង្រីក​ការ​ផ្គត់ផ្គង់​ទឹកស្អាត​​ក្នុង​តំបន់​សេវាកម្ម​​របស់​ខ្លួន​ឱ្យ​បាន១០០% យ៉ាង​យូរ​ត្រឹមឆ្នាំ២០៣០។

ថ្លែងក្នុង​ពិធី​បិទ​វគ្គ​បណ្តុះបណ្តាល​ស្តី​ពី «ការគ្រប់គ្រងទឹកគ្មានចំណូល»​ នៅ​ថ្ងៃ​ទី​១៨ ខែ​កុម្ភៈ ឆ្នាំ​២០២៥ នេះ លោក​រដ្ឋមន្ត្រី ហែម វណ្ណឌី បានលើកឡើងថា ការកាត់បន្ថយ​ទឹកគ្មានចំណូលឱ្យស្ថិតក្នុងកម្រិតទាបបំផុត ជាកត្តា​សំខាន់​មួយ​​ដើម្បីធានាបាន​នូវការផ្គត់ផ្គង់​ទឹកស្អាតប្រកបដោយនិរន្តរភាព និងថ្លៃសមរម្យ។

លោក​បានបន្ថែមថា ក្រសួងកំពុងអនុវត្តវិធានការកែទម្រង់មួយចំនួនសម្រាប់វិស័យទឹកស្អាត រួមមានការ​ពង្រឹង​​សមត្ថភាព​មន្ទីររាជធានី-ខេត្តក្នុងការរចុះធ្វើអធិការកិច្ចចរន្ត និងត្រួតពិនិត្យភាពអនុលោមរបស់ប្រតិបត្តិករ, ការលើកទឹកចិត្តដល់ការវិនិយោគខ្នាតធំ និងមធ្យម ហើយផ្គត់ផ្គង់ទឹកដុំជូនប្រតិបត្តិករដែលស្ទើរលទ្ធភាព, និងការកៀរគរហិរញ្ញប្បទានវិនិយោគក្នុងវិស័យទឹកស្អាត ជាពិសេសគាំទ្រប្រតិបត្តិករ​ឱ្យពង្រឹង​គុណភាពសេវា​ផ្គត់ផ្គង់​ទឹកស្អាត​​ស្រប​​តាម​លក្ខខណ្ឌ​ប្រកាសអនុញ្ញាតជាដើម។

ថ្មីៗនេះ រាជរដ្ឋាភិបាលកម្ពុជាបានសម្រេចផ្តល់ថវិកាជូនរដ្ឋាករទឹកចំនួន៥ តាមសំណើរបស់ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ សម្រាប់ការវិនិយោគពង្រីកហេដ្ឋារចនាសម្ព័ន្ធ និងបណ្តាញទឹកស្អាតនៅតាម ខេត្តគោលដៅមួយចំនួន គឺខេត្តកំពត ស្វាយរៀង កំពង់ធំ មណ្ឌលគីរី និងពោធិ៍សាត់៕