ត្រាំ ប្រកាសដំឡើងពន្ធទ្រង់ទ្រាយធំជាសកល ក្នុងនោះកម្ពុជា រងគ្រោះខ្លាំង

នៅថ្ងៃព្រហស្បតិ៍ទី៣ខែមេសាឆ្នាំ២០២៥ ប្រធានាធិបតីអាមេរិក ដូណាល់ ត្រាំ បានប្រកាសពីការដំឡើងពន្ធគយទ្រង់ទ្រាយធំថ្មី ដែលជាផែនការលោកដាក់ឈ្មោះថា «ទិវារំដោះអាមេរិក» ហើយក្នុងនោះប្រទេស កម្ពុជា ស្ថិតក្នុងចំណោមដៃគូពាណិជ្ជកម្មដែលអាមេរិក យកពន្ធច្រើនបំផុត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការប្រកាសរបស់លោកត្រាំ, ទីក្រុងវ៉ាស៊ីនតោនកំពុងដាក់ពន្ធគយលើប្រទេសទាំងអស់ដោយផ្អែកលើគោលការណ៍នៃសមភាព។ លោកអះអាងថា វាជាថ្ងៃឯករាជ្យភាពសេដ្ឋកិច្ចសម្រាប់សហរដ្ឋអាមេរិក ឈានទៅរកភាពជោគជ័យ។

ក្នុងចំណោមដៃគូពាណិជ្ជកម្មទាំងអស់ អាមេរិកបញ្ជាក់ថា មានដៃគូពាណិជ្ជកម្មចំនួន៨ ដែលខ្លួននឹងយកពន្ធគយច្រើនជាងគេ ព្រោះចាត់ទុកថា ដៃគូទាំងនោះជា «អ្នកបំពានធ្ងន់ធ្ងរ» ធ្វើឲ្យខូចដល់គោលដៅសេដ្ឋកិច្ចអាមេរិក។

ដៃគូពាណិជ្ជកម្មសំខាន់ៗដែលត្រូវទទួលអត្រាពន្ធគយពិសេសទាំងនេះរួមមាន៖

• កម្ពុជា៖ ៤៩%
• វៀតណាម៖ ៤៦%
• ថៃ៖ ៣៦%
• ចិន៖ ៣៤%
• តៃវ៉ាន់៖ ៣២%
• អាហ្វ្រិកខាងត្បូង៖ ៣០%
• ជប៉ុន៖ ២៤%
• សហភាពអឺរ៉ុប៖ ២០%

ក្រៅពីនេះ ប្រទេសដែលអាមេរិកនឹងយកពន្ធគយមូលដ្ឋាន ១០% ហើយនឹងចូលជាធរមាននៅថ្ងៃទី ៥ ខែមេសារួមមាន៖

• ចក្រភពអង់គ្លេស
• សិង្ហបុរី
• ប្រេស៊ីល
• អូស្ត្រាលី
• នូវែលសេឡង់
• ទួរគី
• កូឡុំប៊ី
• អាហ្សង់ទីន
• អែលសាល់វ៉ាឌ័រ
• អារ៉ាប់រួម
• អារ៉ាប៊ីសាអូឌីត

ជុំវិញវិធានការថ្មីនេះដែរ ក្រុមអ្នកវិភាគជាសកលបានបង្ហាញក្តីបារម្ភថា សង្គ្រាមពាណិជ្ជកម្មដ៏ធំសម្បើមអាចនឹងផ្ទុះឡើងក្នុងពេលដ៏ខ្លីខាងមុខ៕

អត្ថបទ៖ សុខ សុវណ្ណ

ចុចអាន៖ ត្រាំ បញ្ជាក់ថា «ពន្ធឱ្យស្មើគ្នា» នឹងដាក់លើគ្រប់ប្រទេសទាំងអស់