តម្លៃប្រេងអន្តរជាតិ​ធ្លាក់ចុះជាថ្មី ជំរុញ​ដោយកង្វល់ពីតម្រូវការ

តម្លៃប្រេងអន្តរជាតិ​ បានធ្លាក់ចុះជាង ១,៥ ភាគរយ កាលពីថ្ងៃចន្ទ ​ដោយ​អ្នកវិនិយោគ​​​ព្រួយបារម្ភថា ពន្ធគយរបស់សហរដ្ឋអាមេរិកលើដៃគូពាណិជ្ជកម្មរបស់ខ្លួននឹងបង្កើត​ផលប៉ះពាល់សេដ្ឋកិច្ច ដែលនឹងកាត់បន្ថយកំណើនតម្រូវការប្រេង​។ នេះបើតាម​ការចុះផ្សាយរបស់ទីភ្នាក់ងារសារព័ត៌មាន​រ៉យទ័រ។

តម្លៃប្រេង​ឆៅនាពេលអនាគត​ ម៉ាក​ Brent បានធ្លាក់ចុះ ១,១០ ដុល្លារ ឬ ១,៦ ភាគរយ​ ដោយ​ជួញដូរ​នៅត្រឹម ៦៦,៨៦ ដុល្លារ/បារ៉ែល នៅព្រឹកថ្ងៃចន្ទ​នេះ ក្រោយ​បិទការជួញដូរជាមួយ​នឹង​កំណើន ៣,២ ភាគរយ កាលពីថ្ងៃព្រហស្បតិ៍សប្ដាហ៍មុន​​។ ​

ចំណែកឯ​តម្លៃប្រេងឆៅ​អាមេរិក ម៉ាក​ West Texas Intermediate (WTI) វិញ ធ្លាក់ចុះ ១,១១ ដុល្លារ ឬ ១,៧ ភាគរយ ដោយ​ជួញដូរ​នៅតម្លៃ ៦៣,៥៧ ដុល្លារ/បារ៉ែល ក្រោយកើនឡើង ៣,៥៤ ភាគរយ កាលពីវគ្គមុនដូចគ្នា។ សប្ដាហ៍មុន ថ្ងៃព្រហស្បតិ៍ជាថ្ងៃបិទការជួញដូរ​ប្រចាំសប្ដាហ៍ ដោយសារថ្ងៃសុក្រ ជាថ្ងៃបុណ្យអន្តរជាតិ​ ​ Good Friday។

អ្នកយុទ្ធសាស្រ្តទីផ្សារនៅក្រុមហ៊ុនសេវាកម្មហិរញ្ញវត្ថុ IG លោក Yeap Jun Rong បាននិយាយថា​ តម្លៃប្រេង​នៅតែ​មាន​ទិន្នាការ​ទៅរក​ការធ្លាក់ចុះ ខណៈវិនិយោគិន​​នៅតែ​មើលឃើញពី​កម្សោយ​នៃទស្សនវិស័យតម្រូវការ-ផ្គត់ផ្គង់ ​ចំពេល​មាន​ក្ដីបារម្ភពីកំណើនសេដ្ឋកិច្ចសកលក្រោមបរិបទ​នៃពន្ធគយ និង​កំណើន​ការផ្គត់ផ្គង់ពីអង្គការនៃប្រទេសនាំចេញប្រេង និងសម្ព័ន្ធមិត្ត (OPEC+)៕