ការជួញដូរឧបករណ៍និស្សន្ននៅកម្ពុជាមានទំហំជិត ១៩១លានដុល្លារកាលពីឆ្នាំមុន

និយ័តករមូលបត្រកម្ពុជា (SERC) បានបង្ហាញថា ក្នុងឆ្នាំ២០២៤ តម្លៃជួញដូរឧបករណ៍និស្សន្ន(Derivatives Instrument Trading) មានទំហំ ១៩០,៨៧ លានដុល្លារ​ និងមានទំហំជួញដូរសរុប ចំនួន ២៧៧.២៤២ ឡូត បង្ហាញអំពីការចាប់អារម្មណ៍ពីវិនិយោគិនសាធារណមកលើឧបករណ៍ហិរញ្ញវត្ថុមួយនេះ។

ការ​ជួញ​ដូរ​ឧបករណ៍​និស្សន្ទ គឺ​ការ​ជួញដូរ​លើ​កិច្ចសន្យា​គម្លាត​ថ្លៃ (Contract For Difference) នៃ​ឧបករណ៍​ហិរញ្ញវត្ថុ​ដើម​ដែល​ចេញ​ពី​មូលបត្រ​កម្មសិទ្ធិ មូលបត្រ​បំណុល សន្ទស្សន៍ លោហធាតុ​មាន​តម្លៃ ប្រេង​ឆៅ ឧស្ម័ន​ធម្មជាតិ កសិផល រូបិយប័ណ្ណ រួម​ទាំង​គម្រោង​ការពារ​ថ្លៃដើម (Principal Protected Scheme) ជាដើម និង​ដែល​ត្រូវ​បាន​ជួញដូរ​ក្នុង​ទីផ្សារ​។ ឧបករណ៍​និស្សន្ទ​ទាំង​នេះ គឺ​ជា​ឧបករណ៍​ហិរញ្ញវត្ថុ​ដែល​ជា​ប្រភេទ​មួយ​នៃ​មូលបត្រ។

លោក វិន ភក្តី អគ្គនាយករងនៃនិយ័តករមូលបត្រកម្ពុជាបានឱ្យដឹងកន្លងមកថា ​​​​ការ​ដាក់​ឲ្យដំណើរការជួញដូរ​ឧបករណ៍និស្សន្ទ​គិត​ត្រឹម​ឆ្នាំ ២០២៣ បាន​កើនឡើងដល់ ៣០០ លានដុល្លារ ខណៈ​ត្រីមាសទី ១ ឆ្នាំ ២០២៤ ទំហំនៃ​ការ​ជួញដូរមានទំហំ​ដល់ ៥០ លានដុល្លារ។

លោក វិន ភក្តី​បាន​អះអាង​ថា ការ​ដាក់​ឲ្យដំណើរការ​ដំបូង​នៅ​ឆ្នាំ ២០១៧ ទំហំនៃ​ការ​ជូញដូរ​ឧបករណ៍និស្សន្ទ​មាន​ត្រឹម ៤ លាន​ដុល្លារ​ ហើយ​ទំហំនៃ​ការ​ជួញដូរ​មានការ​កើនឡើង​ជា​រៀងរាល់ឆ្នាំ។

លោកថា ការជួញដូរ​ឧបករណ៍និស្សន្ទបែងចែកជា ៦ ប្រភេទមាន​សរុបជាង ២៤៩ ផលិតផល។ ផលិតផល​ឧបករណ៍​និស្សន្ទ​ទាំង ៦ ប្រភេទ រួម​មាន Forex (ការជួញដូររូបិយប័ណ្ណ) កិច្ចសន្យា​លក់​ពង្រីកថ្លៃលោហធាតុ​មានតម្លៃ កិច្ចសន្យាលក់ពង្រីកថ្លៃប្រេងឆៅ កិច្ចសន្យាលក់ពង្រីកថ្លៃ commodity កិច្ចសន្យា​លក់ពង្រីកថ្លៃសន្ទស្សន៍ និងកិច្ចសន្យាលក់ពង្រីកថ្លៃមូលបត្រកម្មសិទ្ធិ។

លោក វិន ភក្តី បាន​បញ្ជាក់​ថា៖« នេះជាមោទនភាពសម្រាប់ប្រទេសកម្ពុជា ដែលទើបចាប់ផ្ដើមទីផ្សារមូលបត្រក្រោយគេ ហើយ​ទីផ្សារ​មានទំហំតូច ប៉ុន្តែការអនុវត្តទីផ្សារនិងការដាក់ឲ្យអនុវត្តបទបញ្ញត្តិផ្សេងៗ​បាន​ធានា​និរន្តភាព តម្លាភាព សុវត្ថិភាពស្របតាមយន្តការថ្នាក់តំបន់និងសកល»។

បើតាម SERC នៅក្នុងឆ្នាំ២០២៤ ខ្លួនក៏បានផ្តល់ការទទួលស្គាល់ដល់សមាគមឈ្មួញ ជើងសាឧបករណ៍និស្សន្ននៅកម្ពុជា ដែលជាចំណុចផ្តើមថ្មីមួយទៀតក្នុងការចាប់យកកាលានុវត្តភាពសម្រាប់អ្នកចូលរួម ក្នុងទីផ្សារ និងវិនិយោគិន៕