តម្លៃប្រេងអន្តរជាតិកើនជិត ២% ពេលបញ្ចប់ការជួញដូរ ជុំវិញការចរចាពន្ធអាមេរិក-ចិន

តម្លៃប្រេងអន្តរជាតិបាន​កើនឡើងជិត ២ ភាគរយ ពេលបញ្ចប់ការជួញដូរប្រចាំសប្ដាហ៍នៅថ្ងៃសុក្រ បង្កើតបានជាកំណើនប្រចាំសប្ដាហ៍ដំបូងរាប់តាំងពីពាក់កណ្ដាលខែមេសា ដោយសារតែសុទិដ្ឋិនិយមចំពោះការចរចាពន្ធគយរវាងមហាអំណាចសេដ្ឋកិច្ចសហរដ្ឋអាមេរិក និងចិន។ នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ។

​តម្លៃប្រេងឆៅនាពេលអនាគត ម៉ាក Brent បានកើនឡើង ១,០៧ ដុល្លារ ឬ ១,៧ ភាគរយ ដោយបញ្ចប់ការជួញដូរនៅតម្លៃ ៦៣,៩១ ដុល្លារ/បារ៉ែល ខណៈប្រេងឆៅនាពេលអនាគតអាមេរិក​ ម៉ាក​ West Texas Intermediate (WTI) វិញ បាន​កើនឡើង ១,១១ ដុល្លារ ឬប្រហែល ១,៩ ភាគរយ ដោយបញ្ចប់ការជួញដូរនៅ ៦១,០២ ដុល្លារ/បារ៉ែល។ តម្លៃប្រេងទាំង ២ បាន​កើនឡើង ៤ ភាគរយ ក្នុងអត្រាប្រចាំសប្ដាហ៍។

កាលពីថ្ងៃព្រហស្បតិ៍ ប្រធានាធិបតីអាមេរិក លោក​ ដូណាល់ ត្រាំ បាន​ថ្លែងថា ចិនគួរតែបើកទីផ្សារឱ្យសហរដ្ឋអាមេរិក ហើយអត្រាពន្ធ ៨០ ភាគរយ គឺហាក់សមស្របលើទំនិញរបស់ចិន​។ លោកថ្លែងយ៉ាងដូច្នេះថា ក្រោយប្រកាសកិច្ចព្រមព្រៀងពាណិជ្ជកម្មជាមួយចក្រភពអង់គ្លេស ដែលជាកិច្ចព្រមព្រៀងដំបូងក្នុងបរិបទពន្ធគយមូលដ្ឋាន/បដិការ។

ការថ្លែងរបស់លោក ក៏ធ្វើឡើងមុនពេលមន្រ្តីជាន់ខ្ពស់អាមេរិក គ្រោងជួបចរចាជាមួយភាគីចិននៅទីក្រុងហ្សេណែវ នា​ថ្ងៃសៅរ៍នេះផងដែរ ដែលបង្ហាញពីសុទិដ្ឋិនិយមបន្ថែមលើការបន្ធូរបន្ថយភាពតានតឹងក្នុងសង្រ្គាមពាណិជ្ជកម្ម។

កន្លងមក គោលនយោបាយពន្ធបាន​បង្កភាពមិនប្រាកដប្រជា និងបង្កើនក្ដីបារម្ភពីការធ្លាក់ចុះនៃសេដ្ឋកិច្ច ដែលអាចប៉ះពាល់ដល់តម្រូវការប្រេងសកល ជាហេតុធ្វើឱ្យតម្លៃប្រេងធ្លាក់ចុះទាបបំផុតក្នុងរយៈពេល ៤ ឆ្នាំ៕