ព័ត៌មានអន្ដរជាតិ

រុស្ស៊ីកំណត់គោលដៅអាស៊ីអាគ្នេយ៍ សម្រាប់ការនាំចេញគ្រាប់ធញ្ញជាតិ

បានផុស

១៩ វិនាទី មុន

នៅ

ថ្ងៃសៅរ៍ ១៩ កក្កដា ២០២៥

ដោយ

ប្រទេសរុស្ស៊ីកំពុងកំណត់គោលដៅទីផ្សារធំៗនៅអាស៊ីអាគ្នេយ៍ និងតំបន់ក្បែរខាងរួមមានវៀតណាម ឥណ្ឌូណេស៊ី ម៉ាឡេស៊ី ហ្វីលីពីន និងបង់ក្លាដែស សម្រាប់ការនាំចេញគ្រាប់ធញ្ញជាតិសម្រាប់រដូវកាលប្រមូលផលថ្មី ដែលចាប់ផ្ដើមតាំងពីថ្ងៃទី ១ កក្កដា។ នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ ដែលស្រង់សម្ដីរបស់ លោក Ilya Ilyushin ប្រធានទីភ្នាក់ងារនាំចេញរបស់រដ្ឋ Agroexport នៅសប្ដាហ៍នេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

រុស្ស៊ី ដែលជាប្រទេសនាំចេញស្រូវសាលីធំជាងគេលើពិភពលោក កំពុងចង់ធ្វើពិពិធកម្មការនាំចេញកសិផល លើសពីប្រទេសអតិថិជនជាប្រពៃណី ដូចជាអេហ្ស៊ីប និងតួកគី ដើម្បីគាំទ្រអ្នកផលិតក្នុងស្រុក។ កាលពីរដូវកាលមុន រុស្ស៊ីបានបង្កើនការផ្គត់ផ្គង់ស្រូវសាលីដល់ប្រទេសវៀតណាមរហូតដល់ទៅ ៤ ដង។

លោក Ilyushin បាននិយាយថា៖ «ឥឡូវនេះ គោលដៅរបស់យើងគឺចូលទៅក្នុងទីផ្សារអាស៊ីអាគ្នេយ៍។ នេះមិនត្រឹមតែវៀតណាម និងបង់ក្លាដែសប៉ុណ្ណោះទេ ប៉ុន្តែក៏មានម៉ាឡេស៊ី និងហ្វីលីពីនផងដែរ។ នេះគឺជាប្រទេសធំៗដែលមានអំណាចទិញ និងការនាំចូលគ្រាប់ធញ្ញជាតិយ៉ាងច្រើន»។

រុស្ស៊ីរំពឹងថាការប្រមូលផលធញ្ញជាតិនៅឆ្នាំ ២០២៥ នឹងកើនដល់ ១៣៥ លានតោន ដោយកើនឡើង ៤ ភាគរយ ធៀបនឹងឆ្នាំមុន ទោះបីជាមានគ្រោះរាំងស្ងួតនៅតំបន់មួយចំនួនក៏ដោយ។ ទន្ទឹមនឹងនេះ រុស្ស៊ីមានគម្រោងនាំចេញស្រូវសាលីចំនួន ៤៥ លានតោននៅរដូវកាលនេះ ពោលគឺកើនឡើងពី ៤៤ លានតោនកាលពីរដូវកាលមុន៕