ព័ត៌មានអន្ដរជាតិ

ការលក់រថយន្ត Tesla បន្តធ្លាក់ចុះគំហុកនៅខែកក្កដា ប្រមាណ ៤០%

បានផុស

១១ ខែ មុន

នៅ

ថ្ងៃព្រហស្បតិ៍ ២៨ សីហា ២០២៥

ដោយ

ការលក់រថយន្តនៅអឺរ៉ុបរបស់ក្រុមហ៊ុនផលិតរថយន្តអគ្គិសនី Tesla របស់លោក អេឡុន ម៉ាសក៍ បានបន្តធ្លាក់ចុះជាគំហុកនៅខែកក្កដា ដែលជាការធ្លាក់ចុះ ៧ ខែជាប់ៗគ្នា ចំពេលដែលគូប្រជែងកត់ត្រាពីកំណើន។ នេះបើតាមការចុះផ្សាយរបស់បណ្ដាញទូរទស្សន៍ CNBC។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សមាគមក្រុមហ៊ុនផលិតរថយន្តអឺរ៉ុប (ACEA) បានឱ្យដឹងថា ការចុះបញ្ជីរថយន្តថ្មីម៉ាក Tesla មានចំនួនសរុបប្រមាណ ៨ ៨៣៧ គ្រឿង នៅក្នុងខែកក្កដា ដោយធ្លាក់ចុះ ៤០ ភាគរយ ធៀបនឹងរយៈពេលដូចគ្នាកាលពីឆ្នាំមុន។ ផ្ទុយទៅវិញ BYD បានចុះបញ្ជីរថយន្តថ្មី រហូតដល់ ១៣ ៥០៣ នៅខែកក្កដា ដោយកើនឡើងកប់ពពក ២២៥ ភាគរយ ធៀបនឹងឆ្នាំមុន។

ទិន្នន័យរបស់ ACEA បានបង្ហាញថា ការធ្លាក់ចុះរបស់ក្រុមហ៊ុន Tesla បានកើតឡើង ខណៈការលក់រថយន្តអគ្គិសនីសរុបទាំងអស់ បានកើនឡើងនៅអឺរ៉ុបក៏ដោយ។

គេមើលឃើញថា ក្រុមហ៊ុនរបស់លោក ម៉ាសក៍ បច្ចុប្បន្នកំពុងរងការប្រកួតប្រជែងយ៉ាងខ្លាំងនៅអឺរ៉ុប ចំពេលដែលក្រុមហ៊ុនក៏ខូចកេរ្តិ៍ឈ្មោះ ដោយសារតែទំនាក់ទំនងនយោបាយរបស់លោក ម៉ាសក៍ និងប្រធានាធិបតីអាមេរិក លោក ដូណាល់ ត្រាំ។

មែនទែនទៅ Tesla បានប្រឈមមុខនឹងការលំបាកទូទាំងសកលក្នុងរយៈពេលថ្មីៗនេះ ដោយប្រាក់ចំណូលពីការលក់រថយន្តរបស់ក្រុមហ៊ុន បានធ្លាក់ចុះក្នុងត្រីមាសទី២នៃឆ្នាំនេះ ខណៈលោក ម៉ាសក៍ ឯណោះវិញ បានព្រមានថា ការលំបាកសម្រាប់ក្រុមហ៊ុនអាចនឹងបន្តប៉ុន្មានត្រីមាសទៅមុខទៀត៕