តម្លៃប្រេងបន្តធ្លាក់ចុះ ជុំវិញកំណើនការផ្គត់ផ្គង់ និងកម្សោយតម្រូវការនៅអាមេរិក

តម្លៃប្រេងអន្តរជាតិ​បាន​បន្តធ្លាក់ចុះនៅព្រឹកថ្ងៃសុក្រ ដែលថ្ងៃបញ្ចប់ការជួញដូរប្រចាំសប្ដាហ៍ ដោយសារតែកំណើននៃការផ្គត់ផ្គង់សកល និងកង្វល់ពាក់ព័ន្ធនឹង​កម្សោយ​តម្រូវការនៅសហរដ្ឋអាមេរិក​។ នេះបើតាមការចុះផ្សាយរបស់ទីភ្នាក់់ងារសារព័ត៌មាន​រ៉យទ័រ។

តម្លៃប្រេងឆៅនាពេលអនាគត ម៉ាក​ Brent បានធ្លាក់ចុះ ៣០ សេន ឬ ០,៤៥ ភាគរយ មកនៅត្រឹម ៦៦,០៧ ដុល្លារ/បារ៉ែល គិតត្រឹមម៉ោង ៩ ព្រឹកនៅទីក្រុងហុងកុង។ ចំណែកឯតម្លៃប្រេងអាមេរិក ម៉ាក ​West Texas Intermediate (WTI) វិញ បានធ្លាក់ចុះ ៣១ សេន ឬ ០,៥ ភាគរយ មកនៅត្រឹម ៦២,០៦ ដុល្លារ/បារ៉ែល។ ​

ពេលបិទបញ្ចប់ការជួញដូរនៅថ្ងៃព្រហស្បតិ៍ តម្លៃប្រេងម៉ាក Brent បាន​ធ្លាក់ចុះ ១,៧ ភាគរយ ខណៈ WTI បាន​ធ្លាក់ចុះ ២ ភាគរយ។

ការ​ធ្លាក់ចុះនៅថ្ងៃព្រហស្បតិ៍ បានកើតឡើងនៅពេលដែលទីភ្នាក់ងារថាមពលអន្តរជាតិ បាននិយាយនៅក្នុងរបាយការណ៍ប្រចាំខែរបស់ខ្លួនថា ការផ្គត់ផ្គង់ប្រេងពិភពលោកនឹងកើនឡើងយ៉ាងឆាប់រហ័សជាងការរំពឹងទុកនៅឆ្នាំនេះ ដោយសារ​កំណើនផលិតកម្មរបស់អង្គការនៃប្រទេសនាំចេញប្រេងកាត និងសម្ព័ន្ធមិត្ត (OPEC+)។

ក្រៅពីនេះ អ្នកជំនាញខ្លះបាន​លើកឡើងពីកង្វល់កម្សោយតម្រូវការនៅសហរដ្ឋអាមេរិក ដែលជាប្រទេសប្រើប្រេងច្រើនជាងគេបំផុត។ បញ្ហាទាំងនេះ ធ្វើឱ្យ​តម្លៃប្រេងធ្លាក់ចុះ ទោះបីជាក្ដីបារម្ភពីការរំខានផ្នែកផ្គត់ផ្គង់ជុំវិញជម្លោះ​មជ្ឈិមបូព៌ា និង​អ៊ុយក្រែនក្ដី៕