ខេត្តកណ្តាលឃាត់មនុស្ស៣២នាក់ល្មើសបម្រាមរដ្ឋាភិបាល

អាជ្ញាធរខេត្តកណ្តាលបានធ្វើការឃាត់ខ្លួនមនុស្សបានចំនួន៣២នាក់ស្រី១៩នាក់ដែលល្មើសនឹងបម្រាមរដ្ឋាភិបាលក្នុងកំឡុងពេលបិទខ្ទប់នៅក្រុងតាខ្មៅនៃខេត្តកណ្តាល។

លោក គ្រុយ ម៉ាឡែន នាយករដ្ឋបាលសាលាខេត្តកណ្តាលបានឱ្យដឹងនៅរសៀលថ្ងៃទី០៣ឧសភានេះថា រហូតមកដល់ពេលនេះរដ្ឋបាលខេត្តកណ្តាលបានធ្វើការឃាត់ខ្លួនមនុស្សបានចំនួន៣២នាក់ មានស្រី១៩នាក់ដែលល្មើសនឹងបម្រាមរដ្ឋាភិបាលក្នុងកំឡុងពេលបិទខ្ទប់នៅក្រុងតាខ្មៅនៃខេត្តកណ្តាល។

លោក គ្រុយ ម៉ាឡែន បានបន្តថា ក្នុងចំណោមអ្នកល្មើសនឹងបម្រាមរបស់រដ្ឋាភិបាលចំនួន៣២នាក់នោះ ក្នុងនោះមនុស្សចំនួន៨នាក់ មានស្រី១នាក់បានបញ្ជួនសំណុំរឿងទៅកាន់តុលាការដើម្បីចាត់ការតាមផ្លូវច្បាប់ អប់រំណែនាំឱ្យត្រឡប់ទៅលំនៅដ្ឋានវិញចំនួន២៤នាក់មានស្រី១៨នាក់ និងបានពិន័យប្រាក់អន្តរកាលបានចំនួន៣០លានរៀល។

គួរបញ្ជាក់ថា ដើម្បីទប់ស្កាត់ការឆ្លងរាលដាលជំងឺកូវីដ-១៩ រដ្ឋាភិបាលបានបិទខ្ទប់ភូមិសាស្ត្ររាជធានីភ្នំពេញ​ និងក្រុងតាខ្មៅ នៃខេត្តកណ្តាលចំនួន១៤ថ្ងៃ ចាប់ពីម៉ោងសូន្យថ្ងៃទី១៤ ដល់ថ្ងៃទី២៨ ខែមេសា ឆ្នាំ២០២១ ហើយបានបន្តបិទរយៈពេលមួយសប្តាហ៍ទៀតចាប់ពីថ្ងៃទី២៩ ខែមេសា រហូតដល់ថ្ងៃទី០៥ ខែឧសភា ឆ្នាំ២០២១។

បើតាមក្រសួងសុខាភិបាលគិតត្រឹមព្រឹកថ្ងៃទី0៣ ខែឧសភា ឆ្នាំ២០២១នេះ ខេត្តកណ្តាលមានអ្នកឆ្លងជំងឺកូវីដ-១៩ ចំនួន១,២១២នាក់ អ្នកជាសះស្បើយចំនួន៤៨៩នាក់ និងអ្នកកំពុងសម្រាកព្យាបាលនៅមន្ទីរពេទ្យចំនួន៧២៣នាក់៕

អត្ថបទ៖ សំអឿន