អាជ្ញាធរខេត្តឧត្តរមានជ័យចុះសិក្សា និងកំណត់ទីតាំងឈាបនដ្ឋានសម្រាប់បូជាសពអ្នកស្លាប់ដោយសារកូវីដ១៩

ថ្ងៃទី០៩ ខែឧសភា ឆ្នាំ ២០២១ លោក អ៊ុន សុភ័ក្រ អភិបាលក្រុងសំរោងបានអញ្ជើញចូលរួម និងអមដំណើរឯកឧត្តម ប៉ែន កុសល្យ អភិបាល នៃគណៈអភិបាលខេត្តឧត្តរមានជ័យ ដែលបានដឹកនាំក្រុមការងារចុះសិក្សា និងកំណត់ទីតាំងសម្រាប់ត្រៀមរៀបចំជាឈាបនដ្ឋាន ដើម្បីជាការត្រៀមបម្រុងក្នុងការបូជាសពអ្នកដែលបានស្លាប់ដោយសារជំងឺកូវីដ-១៩ (COVID-19)។

ការចុះសិក្សាទីតាំងទីមួយ នៅក្នុងបរិវេណវត្តដីថ្មី ស្ថិតនៅក្នុងភូមិគោករំដួល សង្កាត់សំរោង ទីតាំងទីពីរ នៅវាលកប់សព ស្ថិតនៅភូមិថ្មី សង្កាត់កូនគ្រៀល និងទីតាំងទីបី ស្ថិតនៅបរិវេណវត្តចំប៉ានួនស្រីក្បាលស ស្ថិតនៅភូមិក្តុល សង្កាត់កូនគ្រៀល ដែលទីតាំងបីខាងលើនេះ ស្ថិតនៅក្នុងសិក្សារបស់ក្រុមការងារ និងការសម្រេចឯកភាពដ៏ខ្ពង់ខ្ពស់ពីសំណាក់ឯកឧត្តមអភិបាល នៃគណៈអភិបាលខេត្តឧត្តរមានជ័យ។

គួរបញ្ជាក់ផងដែរថា នៅក្នុងដំណើរចុះសិក្សានេះ ឯកឧត្តម ប៉ែន កុសល្យ អភិបាល នៃគណៈអភិបាលខេត្តឧត្តរមានជ័យ និងក្រុមការងារ បានវេរប្រគេនបច្ច័យដល់ព្រះភិក្ខុសង្ឃគង់នៅវត្តចំប៉ានួនស្រីក្បាលស ដើម្បីប្រគេនព្រះសង្ឃប្រើប្រាស់តាមការគួរ៕

អត្ថបទ៖ ចាន់ ធី