ពលរដ្ឋឥណ្ឌា នៅតែទៅមុជទឹកទន្លេគង្គា ទោះសពអ្នកស្លាប់ដោយសារកូវីដ បន្តអណ្តែតស្អុយរលួយពេញទន្លេ រាល់ថ្ងៃ

សពជនរងគ្រោះដោយសារជំងឺកូវីដ-១៩រាប់រយនាក់ នៅតែបន្តអណ្តែតពាសពេញទន្លេគង្គា ក្នុ​ងប្រទេសឥណ្ឌា ខណៈប្រទេសនេះ កំពុងតស៊ូជាមួយចំនួនអ្នកស្លាប់ក្នុងកម្រិតកំណត់ត្រា។

ប្រជាពលរដ្ឋមកពីទីប្រជុំជននានានៅតាមដងទន្លេប្រវែង២,៥២៥គីឡូម៉ែត្រមួយនេះ និយាយថា សាកសពថ្មីៗរាប់សិបនាក់ បានអណ្តែតជារៀងរាល់ថ្ងៃហើយអះអាងថា ព្រឹត្តិការណ៍បែបនេះគូសបញ្ជាក់ថា ចំនួនអ្នកស្លាប់ដោយសារជំងឺកូវីដ-១៩របស់ឥណ្ឌា ខ្ពស់ជាងចំនួនផ្លូវការឆ្ងាយណាស់។

ប្រទេសឥណ្ឌា បាននិងកំពុងប្រយុទ្ធជាមួយជំងឺកូវីដ-១៩រលកទី២ដ៏ធ្ងន់ធ្ងរ អស់រយៈពេលមួយខែមកហើយ ហើយថ្វីបើចំនួនករណីឆ្លងចាប់ផ្តើមថយចុះក៏ដោយ ប៉ុន្តែប្រទេសនេះកំពុងប្រឈមនឹងករណីស្លាប់ក្នុងកម្រិតកំណត់ត្រាជាបន្តបន្ទាប់។

ឥឡូវនេះ ប្រជាពលរដ្ឋនៅរដ្ឋ Uttar Pradesh បាននិយាយថា ពួកគេត្រូវបង្ខំចិត្តដើរកាត់តាមសាកសពដើម្បីទៅមុជទឹកទន្លេ រីឯសត្វឆ្កែនិងបក្សីស៊ីសាកសពជាអាហារ។

ឈុតឆាកដ៏សែនអាក្រក់នៅទន្លេគង្គា បានចាប់ផ្តើមកាលពីសប្តាហ៍មុន នៅពេលសាកសពចំនួន៧១នាក់ បានអណ្តែតមកទើរលើច្រាំងក្នុងភូមិ Chausa។

នៅថ្ងៃបន្ទាប់ក្នុងភូមិ Gahmar ដែលមានចម្ងាយជាង៩គីឡូម៉ែត្រពីទីនោះ សាកសពស្អុយរលួយជាច្រើនទៀតត្រូវបានអ្នកភូមិប្រទះឃើញ។

នៅថ្ងៃព្រហស្បតិ៍នេះ ក្រសួងសុខាភិបាលឥណ្ឌាបានប្រកាសថា មានករណីឆ្លងជំងឺកូវីដ-១៩ ចំនួន២៧៦,១០០ករណីដែលនាំឲ្យករណីសរុបកើនដល់ ២៥,៧៧២,៤៤០ករណី ខណៈអ្នកស្លាប់សរុបកើនដល់២៨៧,១២២នាក់៕

សូមទស្សនាវីដេអូ

ប្រែសម្រួល៖ Vann Vann

ប្រភព៖ Daily Mail

ចុចអាន៖ កូវីដ រលក ទីបី ចៀស មិន ផុត ឡើយ បើ យុទ្ធនាការ ចាក់ វ៉ាក់សាំង នៅ តែ មាន សភាព យឺតយ៉ាវនៅឥណ្ឌា