អធិការរងនគរបាលខណ្ឌមានជ័យម្នាក់ រកឃើញមានវិជ្ជមានកូវីដ១៩

លោកវរសេនីយ៍ទោ គង់ គា អធិការរងនគរបាលខណ្ឌមានជ័យ ទទួលផែនសន្តិសុខ ត្រូវក្រុមគ្រូពេទ្យតេស្តិ៍សំណាកឃើញមានវិជ្ជមានកូវីដ១៩ កាលពីវេលារសៀលថ្ងៃទី២៧ ខែឧសភា ឆ្នាំ២០២១ ។ ក្រោយលទ្ធិផលពិនិត្យឃើញវិជ្ជមានកូវីដ១៩រួច លោកត្រូវក្រុមគ្រូពេទ្យដឹកតាមរថយន្តយកទៅព្យាបាលនៅមជ្ឍមណ្ឌលកោះពេជ្រ។

ទន្ទឹមនឹងនោះដែរ អធិការនគរបាលខណ្ឌមានជ័យលោក វរសេនីយ៍ ម៉េង វិមានតារ៉ា បានណែនាំដល់មន្ត្រីនគរបាលចំណុះខណ្ឌមានជ័យទាំងអស់ ដែលបានប៉ះពាល់ផ្ទាល់ ឬប្រយោលសូមដាក់ខ្លួនអោយនៅដាច់ដោយឡែក ដើម្បីពិនិត្យតាមមដានអាការះសុខភាពរបស់ខ្លួន ពិសេសបើមានការសង្ស័យខ្ពស់ សូមប្រញ៉ាប់ទៅធ្វើតេស្តិ៍រកមេរោគកូវីដ១៩អោយបានទាន់ពេលវេលា ។

សូមបញ្ជាក់ថា ក្នុងរយះកាល នៃការផ្ទុះជម្ងឺកូវីដ១៩នេះ លោកវរសេនីយ៍ទោ គង់  គា ត្រូវបានគេសង្គេតឃើញថា មានការខិតខំប្រឹងប្រែងជាខ្លាំងទាំងកម្លាំងកាយចិត្តក្នុងការបំពេញភារកកិច្ចបម្រើដល់ប្រជាជនក្នុងមូលដ្ឋាន ក៏ជាសង្គមជាតិទាំងមូល ផងដែរ ។

គួរបញ្ជាក់ផងដែរថា សម្រាប់ភូមិសាស្ត្រខណ្ឌមានជ័យមាន៧សង្កាត់ ក្នុងនោះ៦សង្កាត់ គឺត្រូវបានចាត់ទុកជា « តំបន់លឿន » ទៅហើយ ដែលជាតំបន់មានហនិភ័យតិច នៃការឆ្លងជម្ងឺកូវីដ១៩ ។ ក្នុងនោះដែរ នៅឡើយតែតំបន់មួយចំនួនក្នុងភូមិសាស្ត្រសង្កាត់ស្ទឹងមានជ័យ៣ប៉ុណ្ណោះ ដែលត្រូវអាជ្ញាធរនៅកំណត់បន្តថា ជា « តំបន់លឿងទុំ » ដែលជាមានតំបន់មានការឆ្លងក្នុងកម្រិតមធ្យម ។ ប៉ុន្តែប៉ុន្មានថ្ងៃក្រោយមកនេះ បែរជារកឃើញមានការចម្លងហាក់កើនឡើងវិញផងដែរ ជាក់ស្តែងដូចករណីឆ្លងនៅក្នុងរោងចក្រខាងលើជាដើម ៕

អត្ថបទ៖ លីហេង