កន្លះខែហើយ កម្ពុជាមិនមានអ្នកស្លាប់ដោយសារជំងឺកូវីដ-១៩

រយៈពេល កន្លះខែ ឬ ១៥ថ្ងៃជាប់គ្នាមកនេះ កម្ពុជាមិនមានអ្នកស្លាប់ ដោយសារជំងឺកូវីដ-១៩ ជាបន្ត។

ក្រសួងសុខាភិបាល នៅថ្ងៃទី ១៩ ខែមករា ឆ្នាំ ២០២២ នេះ បានចេញសេចក្តីប្រកាសព័ត៌មាន ស្ដីពី ការសរុបស្ថានភាពជំងឺកូវីដ-១៩ ក្នុងព្រះរាជាណាចក្រកម្ពុជា សម្រាប់ថ្ងៃទី ១៨ ខែមករា ឆ្នាំ ២០២២ ដោយបង្ហាញថា មិនមានអ្នកស្លាប់ដោយសារជំងឺកូវីដ-១៩ នោះទេ។

រយៈពេល ១៥ ថ្ងៃជាប់គ្នា ពោលគឺចាប់ពីតាំងពីថ្ងៃទី ៥ ខែមករាមក កម្ពុជាមិនមានអ្នកស្លាប់ដោយជំងឺកូវីដ-១៩។

សេចក្ដីជូនព័ត៌មានខាងលើ បានបង្ហាញការរកឃើញអ្នកឆ្លងកូវីដថ្មី ប្រភេទអូមីក្រុងចំនួន ៣០ នាក់ (លទ្ធផលបញ្ជាក់ដោយ PCR) ក្នុងនោះករណីនាំចូលចំនួន ៧ នាក់ និងឆ្លងក្នុងសហគមន៍ ២៣នាក់ និងអ្នកជំងឺចំនួន ១៧ នាក់ជាសះស្បើយ។

គួរបញ្ជាក់ថា គិតត្រឹមការប្រកាសរបស់ក្រសួងសុខាភិបាលថ្ងៃទី១៨ ខែមករានេះ កម្ពុជារកឃើញអ្នកឆ្លងជំងឺកូវីដ១៩ សរុបចំនួន ១២០ ៨៧៧ នាក់ អ្នកជាសះស្បើយសរុបចំនួន ១១៧ ១៤៦ នាក់ និង ករណីស្លាប់សរុបចំនួន ៣ ០១៥ នាក់៕