កវីនិពន្ធល្បីឈ្មោះទសវត្សរ៍៩០ លោក ខៀវ កាថា ទទួលមរណភាពហើយ ខណៈសពតម្កល់ធ្វើបុណ្យនៅស្រុកកំណើត

មហាជនមានការសោកស្តាយជាពន់ពេក បន្ទាប់ពីដឹងដំណឹងដ៏គួរឱ្យសោកសង្រេង នៃការទទួលមរណភាពរបស់លោក ខៀវ កាថា ដែលជាអ្នកនិពន្ធល្បីឈ្មោះ នាអំឡុងទសវត្សរ៍៩០ ដោយរោគាពោធ។

បើតាមការជូនដឹងបានបញ្ជាក់កវីនិពន្ធបទ “អនិច្ចាអ្នកស្រែ” លោក ខៀវ កាថា បានទទួលមណរភាពនៅថ្ងៃទី១៨ ខែវិច្ឆិកា ឆ្នាំ២០២៥ ដោយរោគាពាធក្នុងជន្មាយុ ៧៤ឆ្នាំ ខណ:បច្ចុប្បន្នសពរបស់លោក ត្រូវបានតម្កល់ទុកធ្វើបុណ្យតាមប្រពៃណីនៅឯស្រុករតនមណ្ឌល ខេត្តបាត់ដំបង។

លោក ខៀវ វន្នី ដែលត្រូវជាកូនប្រុសបង្កើតរបស់លោក ខៀវ កាថា បានបញ្ជាក់ថា ឪពុករបស់លោកបានធ្លាក់ខ្លួនឈឺធ្ងន់ហើយត្រូវបានក្រុមគ្រួសារបញ្ជូនមកសង្គ្រោះបន្ទាន់នៅមន្ទីរកាល់ម៉ែត្រ កាលពីថ្ងៃទី០៤ ខែវិច្ឆិកា ឆ្នាំ២០២៥ អស់រយៈពេលជាង១០ថ្ងៃ ប៉ុន្តែស្ថានភាពជំងឺនៅតែមិនទាន់ធូរស្បើយ ទើសម្រេចបញ្ជូនទៅព្យាបាលនៅឯប្រទេសវៀតណាម។

លោកបន្តទៀតថា ដោយសាស្ថានភាពជំងឺដល់ដំណាក់ចុងក្រោយ ក៏បញ្ជូនមកស្រុកវិញ លុះមកដល់ខេត្តកំពង់ឆ្នាំងឪពុករបស់លោកក៏បានទទួលមរណភាពតែម្តង។ សូមជម្រាបថា លោក ខៀវ កាថា គឺជាកវីនិពន្ធមានឈ្មោះល្បីល្បា ញនាទសវត្សរ៍៩០ ។ បទចម្រៀងល្បីៗដែលជាស្នាដៃនិពន្ធរបស់លោក រួមមានដូចជាបទចម្រៀង “លក់ស្រែចូលបា”, “ម្ចាស់អូរស្រីខ្មៅ” និងបទ “អនិច្ចាអ្នកស្រែ” ជាដើម៕ អត្ថបទ៖ ចាន់រ៉ា